غادة عبد الرازق: «عادل إمام وهو قاعد في البيت تاعبهم.. وبضحك لما بشوف الشائعات عليه»

هاجمت الفنانة غادة عبد الرازق مروجي شائعات وفاة واعتزال الزعيم عادل إمام، كما كشفت تفاصيل فيلمها الجديد الذي يحمل اسم "البقاء للأصيع".

وقالت غادة عبد الرازق، في تصريحات تلفزيونية: "بضحك لما بشوف الكلام ده، وبعدين مين أصلا يتكلم عن عادل إمام، يعني لما حد ييجي ويقول اسمه المفروض يقول الأسطورة عادل إمام، حتى وهو قاعد في بيته تاعبهم وقالقهم، فده شيء جميل، أنت عايز أحسن من كدة عظمة إيه، عادل بقاله سنتين مبيعملش حاجة وهو قاعد في البيت مضايقهم".

وعن تفاصيل فيلمها الجديد، قالت غادة عبد الرازق: "فيلمي الجديد اسمه البقاء للأصيع، ده فيلم كوميدي معايا أحمد آدم وبيومي فؤاد ومحمود حافظ، هو تركيبة دمها خفيف وأنا بقالي كتير معملتش كوميدي فـ اتبسطت جدا بالتجربة، وكنت سعيدة جدا لأن المخرج شريف إسماعيل إنسان جميل، وأنا مستنياه ينزل عشان أنا كغادة أتفرج عليه".

كما علقت غادة عبد الرازق على الهجوم  الذي حدث على فيلم الفنان محمد هنيدي الأخير مرعي البريمو، وقالت: دي بتبقى حسابات خاصة وناس بتخلص حسابات مع ناس، لكن حكاية إن العمل يجلي، أعظم نجوم جابتها مصر من الخمسينات والأربعينات عملوا أفلام كويسة جدا وعملوا أفلام تانية لو شفتها هتقول هما إزاي عملوا ده وقبلوه ليه، وأيامها مكنش ينفع تقول دول بيشتغلوا عشان الفلوس، لا دول كانوا نجوم أكتر من صف أول كمان، حتى أنا، كلنا بلا استثناء حصلنا ده واللي أعظم من غادة عبد الرازق بكتير وأسماء كبيرة عملوا أعمال مهمة جدا، ولكن تلاقيهم عاملين أعمال تانية متصدقش إنهم عملوها