بعد الهجوم عليه.. منشور آخر لـ تامر حبيب.. اعرف التفاصيل

تصدر السيناريست تامر حبيب، السوشيال ميديا وصفحات التواصل الاجتماعي، بعد تصريحاته بشأن عدم صيامه شهر رمضان منذ نحو 6 سنوات، لظروف وأسباب صحية، والذي اعلن عنه بعد واقعتي منع سيدة "مسيحية" من تناول الطعام في نهار رمضان داخل محل كشري شهير، وتكفير الفاطر بإحدى الصحف.

وتسببت كلمات تامر حبيب، في جعله يتصدر التريند، إثر تفاعل رواد السوشيال ميديا حول ما قاله بالموافقة أو الاعتراض على طريقته، الأمر الذي جعله يصدر يكتب منشور آخر على حسابه بـ«فيسبوك».

وجاء منشوره كالآتي: «تعقيبًا علي البوست اللي فات واللي كتبت فيه عن موضوع الست المسيحية ومحل الكشري، وخبر تكفير اللي يشتري أكل في نهار رمضان اللي انتشر، أنا فوجئت من بعد ما نزلت البوست بربع ساعة باتصالات لا نهائية ولغاية دلوقتي حالًا، وإن البوست أتعمله أكثر من 300 شير».

وتابع  حبيب: «اللي عرفته، إن كالعادة حصل عليا هجوم رهيب واتشتمت وجبت الشتيمة لـ أمي وأبويا الله يرحمهم في الأيام المفترجة دي، وربنا يجعله في ميزان حسناتنا، واتقالي إن البعض كفروني كمان والمتسامحين منهم اتهموني بالإجهار بالمعصية».

وأكمل: «وطبعا لأني بأشتغل في الفن وراجل حر ومؤمن بالحرية وبحضر حفلات ومهرجانات وأعياد ميلاد، وبرقص وأضحك وأهرج وأحاول أني استمتع ويكون حضوري إيجابي وصحبتي مش تقيلة، وبحترم نفسي وبحترم الآخر واحترم حريته، يمكن عشان كده الحمدلله ربنا محبب فيا ناس كتير وألف حمد وشكر ليك يا رب وديم عليا النعمة دي واحفظها من الزوال».

وأضاف: «عرفت برضه إن السلخ جامد قوي، وبجد ورحمة أمي وأبويا، أنا ما قريت أي تعليق سلبي أو إيجابي غير اللي على البوست هنا، واعتذرت لكل الأساتذة المعدين اللي طلبوا مني أعمل معاهم مداخلات أوضح فيها موقفي وأدافع عن نفسي من التعليقات، واعتذرت لهم جميعًا مشكورين لأني مش شايف إنه موضوع ولا أنا من هواة التريندات ومبحبهاش».

واستكمل: «عايز أوضح لـ اللي نيتها أو نيته صافية من اللي ممكن يكونوا فهموا البوست غلط، أوما وصلهومش اللي قصدته، وأكرر بأوضح فقط للناس اللي نيتها صافية، ودول أقلية قليلة جداً زي ما إحنا عارفين، والباقي واللي هما الأغلبية العظمى بنواياهم المختلفة غير الصافية ولا المحترمة واللي كلنا بقينا عارفينهم كويس، مش فارقين معايا بالمرة والمصحف الشريف، ولا توضيحي هيفرق معاهم عشان كده كده هما هايبخوا سمهم عشان ده أكل عيشهم».

وتابع: «أرجع وأقول حابب أوضح لأصحاب النوايا الطيبة، إني قصدت بالبوست السابق، إني استفزني الخبرين اللي قريتهم وقلقوني لما يحتويه ما بين سطورهما من خطورة على مجتمعنا اللي اتربيت طول عمري على إنه مجتمع وسطي يحترم الآخر، واللي علموني مخفش من التفكير، وإن عقلي ده نعمة عظيمة من ربنا حرام عليا ماستخدمهاش».

وأضاف حبيب: «الخبرين اللي قريتهم ورا بعض في نفس اللحظة قبضوني وكئبوني، علشان ربنا الرحمن الرحيم السلام الكريم الغفار اللطيف الحليم الغفور مايرضيهوش لا اللي حصل في محل الكشري ولا أتكتب في خبر إحدى الصحف، ومن قبضتي وضيقي، عبرت عن غضبي بإني شربت سيجارة ومية في الشارع، احتجاجُا على ما استفزني، يعني مش إجهار بمعصية، لإني أصلًا مش قابل أن يتقال عليها معصية، ولا الموضوع ليه أي علاقة بالدين ولا العقيدة، اللي أصلًا مافيش مخلوق على وجه الأرض مسموح له يتدخل فيها».

واختتم منشوره قائلا: «أنا قصدت أقول إن استفزازي من اللي قريته، زاد من غضبي وعدوانيتي، وده أنا شايفه خطر، وكتبت إنه خطر كبير، مرة تانية آسف على الإطالة، ورمضان كريم يا كل المصريين وكل الناس أجمعين وربنا اسمه الرحيم».

وكان شن السيناريست تامر حبيب، هجومًا لاذعًا على أحد المطاعم التي منعت سيدة مسيحية مؤخرًا عن تناول الطعام داخل المكان، وهو الأمر الذي أثار ضجة عارمة منذ الإعلان عن هذه الواقعة.

وعبر "حبيب" في منشور له عبر حسابه الرسمي بموقع "فيسبوك" عن غضبه من هذا الموقف، قائلاً: «نظرًا لظروف صحية، أنا مابصومش بقالي حوالي ٦ سنين، و مراعاة لشعور الصايمين بأحاول و أنا في الشارع لا آكل ولا أشرب ولا أدخن على الملأ، إلى أن قرأت عن السيدة المسيحية وطفلها التي منعها العاملين بمحل الكشري عن الأكل قبل آذان المغرب رغم إنهم فاتحين وشغالين».

وأضاف: «بعدها و في نفس الوقت قريت الخبر اللي نزل في المصري اليوم عن حكم بيع الطعام في نهار رمضان، رحت نازل من العربية في وسط الشارع، وولعت سيجارة وقربعت قزازة مية علي بق واحد وأنا عدواني ومتربص ومستني نفر واحد يعترض بكلمة أو إيماءة أو حتي نظرة علشان "..." هو واللي يتشدد له كفاية جهل واستفزاز وغباء، كده خطر، والمصحف الشريف خطر قوي، اللهم بلغت، اللهم فأشهد».