«في أم ظالمة».. خالد عليش يطالب بتغير قانون الأحوال الشخصية

نشر الفنان خالد عليش، بوست عبر حسابه الشخصي بموقع التواصل الاجتماعي "فيسبوك" يطالب فيه بتعديل قانون الحضانة في قانون الأحوال الشخصية، مستدلا بأحداث مسلسل "فاتن أمل حربي".

وكتب عليش معلقا: "قانون الأحوال الشخصية محتاج تعديل يضمن حق الست و الرجل و قبلهم الاطفال.. لو عمل درامي ناقش حالة واحدة بظروف معينة، في حالات تانية كتير مظلومة و متبهدله سواء ستات او رجالة.. احنا زي ما بنتكلم علي اب ظالم مبهدل عياله عشان يذل طليقته، في أم ظالمة بتبهدل عيالها عشان تذل طليقها اللي ساب جنتها و خلع و يتعاقب باقي حياته، حتى لو هي اللي طالبة الطلاق".

وتابع: حق الولاية و الحضانة لازم تكون مشتركة بين الأب والأم، إزاي أب هيربي اولاده و القانون بيديله بس انه يشوفهم كم ساعة في الأسبوع في مكان عام و مش من حقه ياخدهم و يخرجهم او يسافر معاهم، ازاي الطفل اصلا هيبقي في علاقة طيبة بينه و بين والده و هو مش بيشوفه غير ساعتين في الأسبوع والأم طول الأسبوع بتسمعه كلام وحش بشكل مباشر أو غير مباشر عن باباه و جده و جدته".

وأضاف: "لازم الطفل يعيش مع باباه ومامته مشتركين، لازم الطفل يسافر مع باباه و مامته و بتفسح معاهم هما الاتنين".، لازم الأب يكون عنده الحق يدخل لابنه المدرسة و يتناقش مع المدرسين و يرووح الطفل اوقات و يمارس دوره كأب مش يمنعوه من ده".

واختتم منشوره بقوله: "اتقوا الله في اطفالكم و اوعو تشجعو ام مانعة الاب يشوف اولاده بحجة انه هيخطفهم و لو عايز تشوفهم تعالى اقعد في بيت أهلي تتفرج عليهم من بعيد عشان متاخدش الطفل و تهرب او استخدم حق الرؤية و شوف الطفل زي المسجون اللي مستني الزيارة".

يذكر أن هذه ليست المرة الأولى التي ينتقد فيها خالد عليش قانون رؤية الطفل وحضانته، فسبق وانتقد عدم قدرة الأب لرؤية ابنائه.