بائعة «المنتجات الشعبية» بين التعاطف والتنمر

تداول رواد مواقع التواصل الاجتماعي فيسبوك، فيديو لفتاة بسيطة تعلن خلاله عن منتجات ومستحضرات تجميل لبيعها عبر مواقع التواصل.

وسخر وتنمر بعض مستخدمي مواقع التواصل الاجتماعي من الفتاة والمنتجات التي تقوم ببيعها معللين ذلك بأنها تقوم ببيع منتجات مجهولة المصدر "شعبية المصدر" مما تتسبب في أضرار عديدة للبشرة، بينما قام البعض بالتعاطف معها والدفاع عنها كونها فتاة بسيطة تسعى وراء أكل عيشها.

وقال بلوجر يدعي "علاء منصور" على صفحته الشخصية بموقع التواصل الاجتماعي فيسبوك، "فيه ڤيديو مُنتشر لواحدة عادية زيها زي آلاف البشر اللي بيبيعو منتجات شعبية في كُل مكان، واحدة بتسعى ورا لقمة عيشها، لا عندها آكسنت في اللغة ولا بتحشُر كلمة english  وسط كلامها، ولا حتى عارفة تحط فلتر في الڤيديو عشان يطلعها حلوة وبشرتها بيور وصافية زى بقية البلوجرز اللى هم من غير فلاتر ناس أقل من العادي".

وأضاف "المهم إن حفيدات ڤيكتوريا سيكريت وبنات العائلات المالكة ماسكين البنت دي سف وتريقة، عشان هُما بنات كلاس وبراند وبيجيبو أنضف ماتريال من أفخم الأماكن وهي ياااي وحشة بتجيب حاجات نوتي ورخيصة."

وتابع علاء "فِكرة إنّك تتريقي على شخص أقل منك فكريًا أو اجتماعيًا أو بسيط مش دلالة على إنّك واو وجامدة، دي دلالة على إنّك مُحدثة.. كلامي مفهوم يا مُحدثين ياللي بدأتوها بآخر العنقود أبو ٢ ونُص!، ونص البلوجرز واللي مسمين نفسهم إنفلونسر يا ريت يورونا صورهم من 7 سنين كدة".

وعلى النقيد قالت نيفين احدى رواد مواقع التواصل الاجتماعي "بعيدا عن السخرية أو التنمر عن البنات دول.. أنا شخصيا كتبت بوست عنهم امبارح لتحذير البنات من شراء المنتجات مجهولة الهوية دي اللي بتدمر البشرة بدون أي سخرية أو تجريح فيهم ودعيت أننا نشتري المصري علي قدنا علي الأقل معروف المصدر".

ووصفت تريز، الفتاة صاحبة الفيديو بـ"النصابة" قائلة: "دي واحدة نصابة بتبيع منتجات مضروبة وبتقول أنها أصلية وبتستغل احتياج البنات وبتبيع منتجات سعرها الأصلي ٢٠٠٠ جنيه وبتقول أنها بـ٣٥ جنيه، منتجات ممكن تدمر البشرة، في القانون لازم تتحبس بتهمة الغش التجاري مش ندافع عنها، يبقى على كده اللي بيبيع لحم حمير نشجعه علشان بيشتغل شغل بالحلال ومش بيشحت!ً".

ومنهم من تعاطف معها حيث قالت جيهان، "ست مصرية جدعة زي معظم المصريات ربنا يعينها ويرزقها بالحلال".

وأضافت مي، "هي بتبذل مجهود وده شيء يحترم وقالت ربنا كرمني وبقى عندي دكان هو محل بسيط بس أنا متأكدة أن ربنا مش بيضيع مجهود حد، البنت شاطرة ولو البضاعة مش اوريجينال فهي لها زبونها ودي إمكانياتها، دي لها الزبون بتاعها من غير تقليل لقيمة حد، الخلاصة.. أنا معجبة بيها".

وقالت ليلى، "البنت بسيطة وعفوية وقريبة للقلب الله يسعدها ويوفقها".

وقالت أيمي: "البنت زي القمر وهي قمر بدون مكياج ولا فلتر ما شاء الله عليها وعندها حضور وقبول وكل ده صحي الغيره والنقص والغل والحقد معلش ربنا يكفينا شر النقص والشبع من بعد جوع صعب أوي ههههه".

ونصحت هبة، فتاة الفيديو قائلة: "المنتجات مش اصليه وكمان أكيد فيها أضرار كبيره جدا للبشره حتى لو ناس معينه اللي هتشتريها فهي كده بتأذي الناس بجد ويقعدوا سنين بقى يعالجوا البشرة، فهي ممكن تعمل خلطات خاصة بيها وبأسمها، وأكيد الحاجات دي مش مصرح بيها أصلا هي مش فكره تريقه أبدا على فكرة أذية كبيره جدا جدا للناس فعلا وخصوصا الناس الغلبانة اللي بتصدق".