Elasimah AdPlace
Elasimah AdPlace
Elasimah AdPlace

هالة الدمراوى تكتب: هما الإعلاميين فى البرامج بيزعقوا لمين !!

 كتب:  هالة الدمراوى
 
هالة الدمراوى تكتب: هما الإعلاميين فى البرامج بيزعقوا لمين !!
هالة الدمراوي
Elasimah AdPlace
Elasimah AdPlace
Elasimah AdPlace

هما الإعلاميين فى البرامج بيزعقوا لمين!!

هو أنا كل ما أتفرج على برنامج ألاقى المذيع بيزعق ويصرخ .. هو كل يوم الصوت يعلى والحزق يزيد .. هو كل واحد فاهم إنه هو الوحيد اللي فهم وإنه لازم يسفه ويقرع الشعب كله لأنه مش فاهم على المساء !

هو أنا أصلا بتفرج على التليفزيون بعد عناء يوم مرهق، مجهد، موتر ، علشان أهدأ ولا علشان أتعصب وأتوتر وأتهزأ !! 

طيب أقولك حاجة تانية..

هو الزعيق والحزق والمزق اللي بنشوفه كل يوم ده كان جاب نتيجه فى أي يوم! 

طيب التشويح وإيديكم اللي فى وشنا، و حواجبكم اللي طالعة نازلة، وشفايفكم اللي عمالة  تمصمص وتتعوج مرة يمين ومرة شمال .. منعت قتل، ولا عطلت حوادث، ولا صلحت اقتصاد، ولا لداهية لتكونوا فاكرينا فاكرين إن كل اللت والعجن ده عدل مايل و لا صلح متكسر ! 

دة إحنا بنتكلم على المضمون المتشنج الهيستيرى، مش عايزين نتكلم بقي كمان على المذيع وطريقته وفذلكته وكلامه اللي كل شوية بيغيره زى ما بيغير كدة هدومه !

وده مش من سطحيتنا قد ما هو من بجاحته ! 

إيه يا جماعة اللي بيحصل ده .. ده أنا كفاية إنى بسمع حضرتك وإنت امبارح بتنفى خبر وتتهم الصحفيين بترويجه .. ثم إنت ذات نفسك تأتى فى اليوم التالي لتبرر حدوث ما نفيته أمس من أخبار !

هار أسود ! 

يعنى أنا كمشاهد مغلوب على أمره، مطلوب منى تقبل الشخط والنطر ومطلوب منى كمان إنى اقتنع إنك محمد امبارح وأحمد النهاردة .. ! 

يا جماعة الموضوع زاد عن حده، فبدى عند بعض مقدمى البرامج هزليا عبثيا مضحكا ! 

لم أعتد الحديث والنقد باللغة العامية فى كتاباتى .. ولكنى أردت أن يكون كلامى هذة المرة بسيطا جدا .. مباشرا إلى أقصى درجة .. مسفها وساخرا إلى أبعد الحدود ! 

وأهو حتى لو ما فدش .. يضحك !