هيفاء وهبي لـ حمو بيكا: «بحبك وأنت بتسجل.. واللي بيهاجمك طرف ثالث»

دعمت الفنانة اللبنانية هيفاء وهبي، مؤدي المهرجانات حمو بيكا، من خلال مداخلة هاتفية ببرنامج "مصر جديدة"، الذي تقدمه المذيعة إنجي أنور، على قناة ETC.

 وقالت هيفاء في المداخلة: "يا حمو الناس بتحبك، ولما بتركز بشغلك والأغاني الحلوة ده اللي الناس عايزاه منك، متركزش في الهجوم"، ليرد عليها: "ما أنا مش عارف أشتغل بتهاجم بس".

وأضافت هيفاء: "الناس بتحب الحاجات الحلوة ومنك انت بالتحديد، الناس بتنسى الهجوم مع الوقت ولما يشوفوا انك بتعمل حاجات حلوة، الاختلاف مطلوب وحلو وحمو يقدم شيئا مختلفا".

وعن الهجوم الذي تعرضت له هيفاء في بداية مشوارها، علقت: "أنا ابتديت مكنتش بستحمل الهجوم، ابتديت صغيرة غير لما يكون الواحد ناضج وحمو كده، وأنا فهمت من كلامه إن هو سند لعيلته مش عايز حد يهز السند ده وعايز يشتغل".

وأضافت: "في الأول مكنتش بتحمل لأني صغيرة ومعنديش خبرة، اتعلمت من نفسي واكتشفت مع الوقت ان الناس مش هي اللي بتهاجمك، فيه ناس معينة شغلها الهجوم مش ضروري يكونوا فنانين ولا جمهور ده نوع تالت من الناس، أي فنان لما بيركز في شغله بيلاقي نجاحه وشغله بيدافعوا عنه، مش بنحتاج حاجة تاني لما تحس ان شغلك رد لك اعتبارك".

ووجهت نصيحة لحمو أن يرد على الهجوم بعمله لا بالكلام.

وعن رأيها في قرارات نقابة المهن الموسيقية برئاسة الفنان هاني شاكر، قالت: "كلنا بنحترم القوانين أكيد فيه غلطة حصلت ممكن نرجعلها ونحاول نصلح، أنا بحترم الفنان هاني شاكر كتير وخد قرارات بالإجماع بسبب حاجات حصلت لما تتصلح صورتها أمام النقابة وأمام الناس أكيد مش هيمنع أغنية حلوة بكلام جميل ولحن حلو، هو يريد إصلاح واقع حدث به بعض الفوضى، ممكن يكون فيه أشخاص ظُلموا في زحمة القرارات".

وعادت للحديث عن حمو بيكا قائلة: "بحس إن حمو عنده خفة دم وبراءة"، وعرض عليها حمو أن يكتب لها أغنية قائلا: "أكتب لها ويزيدني الشرف انها تغنيها"، لترد هيفاء: "الحاجات دي أنا مش بجامل نفسي ولا الآخرين لو قدم عمل حلو مش هقول لأ".

وعن أكثر ما يعجبها في أغاني حمو بيكا، قالت: "أكتر حاجة بحبها لحمو وهو بيسجل بحب اللحظات دي أوي وبتخلي الناس تقرب منه أكتر، عايزاك تحفظها وهو إنسان طبيعي".