هالة الدمراوي تكتب : عمرو دياب خليك في مكانك فوق !
كتب: هالة الدمراوي
مش عيد ميلاد عمرو دياب بس.. ده عيد ميلاد شبابنا ونضجنا.. ذكرياتنا وسفرياتنا.. حبايبنا و أصحابنا.. خروجاتنا وأعياد ميلادنا.. فرحنا وزعلنا مع بعض ومن بعض.
كلها لحظات وساعات وأيام وسنوات سجلها صوت عمرو دياب بأغنياته لينا وبينا وعلينا ومعانا!، بتحب عمرو دياب أو مش بتحبه.. بتسمع أغنياته أو مش بتسمع.. أكيد عدى عليك وعديت عليه، مؤكد فرحك مره وأثر فيك مره!.
تاريخ طويل من النجاح الذي لا يغفل ولا ينفع "تطنيشه" بكلمة؛ أصلي ما بحبش عمرو دياب، الموضوع بقى أكبر من الحب، والتجربة بقت أعمق من الاغفال.
تجربة النجاح حقيقية جلية ثابتة على الأرض لها جيوش من المُحبين والمُعجبين تؤازرها وتدعمها وتصفق لها.. لا أقول لسنوات، ولكن لعشرات السنوات!.
ولا تُقاس التجارب الفنية بالمدة والسنين فقط، ولكن بالنجاح واستمراره وبالجمهور وفئاته العمرية و الاجتماعية والثقافية وهو ما نراه ونحياه عمرنا كله فقط مع الهضبة وثباتها!.
كل سنة وأنت طيب يا عمرو، كل سنة وأنت مصدر من المصادر الطبيعية للبهجة، شئنا أم أبينا، كل سنة وأنت اللي في أي مكان في عيون باصين حواليك.. ويا عيني أول ما تبان الكل بيجري عليك، كل سنة وأنت فى مكانك فوق!.
