الإعلامي ممدوح موسى لـ«العاصمة»: أنا أضفت لـ عمرو دياب.. واتراهنت معاه على نجاح «بعد الليالي» وكسبت الرهان

كشف الإعلامي ممدوح موسى، عن كواليس علاقته الوطيدة بالهضبة عمرو دياب، مؤكدًا أنه أضاف له الكثير، بالإضافة إلى أنه كان وش الخير على برنامجه "سر التفوق"، وجاء ذلك خلال استضافته في ندوة صحفية في موقع "العاصمة" برئاسة الكاتب الصحفي الكبير أيمن نور الدين. 

وقال "موسى": كانت تربطني بعمرو دياب علاقة صداقة أيام ما كنت بشتغل في الإنتاج الفني، ولما قولتله أنه يطلع معايا في برنامجي "سر التفوق" عجبه اسم البرنامج واستفزيت فيه الحاجة اللي بيحب يوصلها، مع إني لو صاحبه أو أخوه أو عمه مش هيطلع برضه".

وتابع: "فروحت صورت معاه، وكانت بالنسبالي دي الانطلاقة، وكان عمرو دياب وش الخير على "سر التفوق"، بس هو بعدها حاصله تألق، وضفتله كتير".

واستطرد: "أنا أظهرت الجانب الإنساني في حياة عمرو دياب، أنا كنت بصور تفاصيل محدش عمل زيها، يعني وهو بيلعب رياضة، ودايما بيحط مصحف في جيبه، الحاجات اللي عملتها ضافت لعمرو دياب، عشان كده هو سماني نبض الشارع، لأني عارف الناس بتحب إيه".

واستكمل: "اترهنت مع عمرو دياب أن أغنية "بعد الليالي" هى اللي هتنجح في الألبوم ده، وبعد شهر روحنا عملنا حفلة في الساحل، ولما مزيكا أغنية "بعد الليالي" بدأت كان فيه صريخ من الجمهور، فباصلي كده بعد ما خلص وقالي معاك حق أنت اللي كسبت الرهان".

وواصل: "بعد نجاح الأغنية دي، حفلاته وألبوماته اللي بعد كده، كان لازم ياخد رأيي فيها، متابعًا: "وأنا اللي اخترت لإليسا أجمل إحساس ونجحت نجاح كبير، وعندي شرايط مسجلة فيها الملحن وليد سعد والشاعر مصطفى مرسى اللي كانوا بيسمعوا إليسا الأغاني اللي عملوها لفضل شاكر عشان تعرف هما عاملين إيه، وكانت لسه اليسا في بداية مشوارها الفني وهما لسه في بدايتهم".

على الرغم من وصول الخلافات بينهما إلى ساحة القضاء، أكد الإعلامي ممدوح موسى على العلاقة الطيبة التي تجمعه بالهضبة عمرو دياب، والتي شدد بأنها لن تتأثر بهذه الخلافات بقوله: "لسه مكلمني من نصف ساعة هو حاليا في السعودية في حفل تكريم الموسيقار هاني شنودة، وكان فيه خلاف واتحل، كل ده أونطة، عمرنا ما تخاصمنا حتى وهو رافع عليا قضية، القضية خلصت على ولا حاجة".

وجدير بالذكر أن، الإعلامي ممدوح موسى، اشتهر ببرامجه الفنية المثيرة مع نجوم الغناء والتمثيل المصري والعربي، حيث بدأ مسيرته الفنية في فترة التسعينات وكان برنامج (سر التفوق) عام 1997 هو أول البرامج التي حقق شهرة من خلالها، لتتوالى برامجه بعد ذلك، والتي منها برنامج (أسرار النجوم) عام 2000 و(شارع النجوم) عام 2001.

إقرأ أيضًا: الإعلامي ممدوح موسى لـ«العاصمة»: عمرو مصطفى «مؤدي».. وعمرو دياب هو اللي عمله