الرئيس السيسي: قرار الحرب والعمل كان ضروريا في معركتنا ضد الإرهاب

حضر الرئيس عبد الفتاح السيسي، رئيس الجمهورية، الندوة التثقيفية 35 للقوات المسلحة بمناسبة عيد الشهيد، اليوم الأربعاء، وخلال السطور التالية نرصد أهم ما جاء في كلمة الرئيس خلال الاحتفالية.

تكريم أسر الشهداء والمصابين

وجه الرئيس عبد الفتاح السيسي، الشكر والتقدير والاعتزاز والتحية لأسرة كل شهيد وكل مصاب، وبعدها قام بتكريم عدد من أسر شهداء القوات المسلحة.

وقال الرئيس السيسي خلال كلمته: «الحقيقة كنت عاوز دايما أسمعكم الكلام اللي بيقوله الأسر والأهالي الأب والأم والزوجة اللي قدموا أبنائهم أو أزواجهم كلام عجيب والله، إنهم بيتكلموا كده ويقولوا الكلام ده، طالما فيه مصر شعب وأسر زى ما انتوا شايفين، كلهم أسرنا.. ناس كلهم بساط زينا.. واللى راح سند وضهر وضنا.. أبدا كل كلمة تتقال كلمة طيبة رائعة.. مستعدين ونقدم أكتر والأب يقولي وأنا كمان من فضلكم».

تقبيل رأس الأم المثالية

وفي أثناء الاحتفالية قبل الرئيس عبد الفتاح السيسي، رأس الأم المثالية، حيث حصلت عليها السيدة سهير على عبد العزيز عبد اللاه، أرملة رقيب شهيد، محمد نبيل محمد قطب عبد اللاه، والذي استشهد في حرب أكتوبر 1973.

دعوة لتكريم سيرة الشهداء

وتحدث الرئيس السيسي عن الشهداء: «قدموا أرواحهم ودمائهم والمصابين اللي قدموا جزء من أجسادهم علشان تفضل مصر هي مصر.. العهد مننا زى ما هما حرصوا أنها مش تضيع.. احنا كمان نحرص على أنها تفضل موجودة.. مش موجود بس كده.. لا.. موجودة بما يليق بدم وروح كل شهيد، لما بدأت المعركة مع الإرهاب في 2013 و2014 ولغاية شهور قليلة مضت كانت كل الناس بتقول الموضوع ده هيفضل كده على طول.. الكابوس ده هياخدنا وياخد ولادنا».

وتابع الرئيس السيسي: «الشر لا يمكن أن ينتصر على أهل الخير.. مهما كان بشاعة وقسوة وغباء وجهل تصرفهم وعدوانهم.. لا يمكن أن تنجح.. الخير في النهاية هينجح كنا بنقول يا ترى نحاربهم والبلد تستنى كده.. ولا نحاربهم والبلد نبنيها كده.. القرار الحرب والبناء والشغل واحنا بنقاتل.. ومحدش كتير بيعمل كده.. وده كان من فضل ربنا علينا».

وتحتفل القوات المسلحة المصرية يوم 9 مارس من كل عام بيوم الشهيد، وذلك تخليدا لأرواح الشهداء والتذكير بالتضحيات التي قاموا بها في سبيل الحفاظ على الوطن، وتأتي الاحتفالات تزامنا مع ذكرى استشهاد الفريق أول عبد المنعم رياض يوم 9 مارس 1969.

جاء اختيار يوم 9 مارس من كل عام مع ذكرى استشهاد الفريق أول عبد المنعم رياض 1969 والذي ضرب أروع مثال على التواجد في خط المواجهة فكان دائما في الصفوف الأمامية تأكيدا على تلاحم القائد مع جنوده في الميدان.