لأول مرة.. تامر حسني يرد على انتقادات الجمهور لأفلامه الأخيرة

رد الفنان تامر حسني على الاتهامات والانتقادات التي وجهها الجمهور له وذلك عبر «ستوري» صفحته الرسمية على موقع الصور والفيديوهات الشهير «إنستجرام».

واستعان تامر حسني بفيديو للإعلامية ياسمين عز وهي تتحدث عن نجاح تامر حسني، مشيرة إلى أنه دومًا ما تفتخر به عندما تسافر لخارج البلاد.

وعلق تامر حسني على الفيديو الذي نشره، قائلا: «زمن غريب والله بنلوم المجتهد اللي بيألف وبيخرج وسايبين الكسلان وضعاف النفوس يكفيني شرفًا أن فيلم بحبك صاحب أعلى إيرادات في تاريخ السينما العربية دوليًا».

وأضاف: «فيلم تاج تم بيعه بنجم شباك 1 مش تجميعة نجوم، ودي حاجة تحسب للفيلم وبعملها كل سنة الحمد لله، وکونه نوع جديد للسينما العربية يحسب للفيلم برضه، الفيلم الحمد لله تم توزيعه النهاردة عالميًا أكيد دي حاجات بتزعل بعض ضعاف النفوس.. ولكن واقعها على الناس العقلاء جميلة اللي بيتمنوا الخير لابن بلدهم اللي حاجة زي كده بتشجعهم إن مفيش مستحيل ولا يمكن نبقى حافظين مش فاهمين».

وتابع: «أحب أطمنك يا ياسمين إنه لا يصح إلا الصحيح وخلي بالك الجمهور ذكي جدًا ويمكن بسبب الحملات الساذجة دي الجمهور زاد طلبه على الفيلم لإن الحملات زادت فضول الناس إنها تروح الفيلم عشان تحكم بنفسها، ولما راحوا عجبهم الفيلم بدليل إيراداته الضخمة».

واستكمل حديثه: «لو جبت أهم شركات في العالم عشان يقدموا فكرة بالذكاء ده عشان أعمل دعاية لفيلمي مكانوش هيوصلوا لربع المفعول الإيجابي اللي عملوه الحملات واللجان المأجورة في إثارة فضول الناس إنها تروح تشوف الفيلم والله مفعولهم مردودة أقوى من الدعاية اللي بندفع فيها فلوس».

واختتم تامر حسني حديثه: «بالمرة نشيل من على شركة الإنتاج باند الدعاية عشان مكلف أوي بصراحة ونسيبه على المغيوظين هما يدفعوه ربنا ما يقطعلهم عادة أحب أفرحك أكتر يا ياسمين فيلمي اللي جاي تصويري كمان، شكرًا لدفاعك عن الحق يا أحلى ياسمين».