أنغام: بعت عربيتى عشان أنتج أغنية «شنطة سفر»

كشفت النجمة أنغام لأول مرة عن كواليس أغنية "شنطة سفر" للمخرج عاطف الطيب، موضحة أنها لم تكن المطربة الأولى المرشحة للأغنية.

وأضافت أنغام: "كانت أغنية حلوة ومهمة فى وقتها، لأنها كانت في فترة الشباب بدأوا يهاجروا لخارج مصر، والشاعرة اللى كتبتها اسمها فاطمة جعفر وهى إسكندرانية زيى وكانت مرتبطة بأخوها جدا وهو كان وقتها مسافر وكتبت الأغنية وأنا غنيتها وأبويا لحنها".

وتابعت: "وللعلم ماكنتش بتاعتى في الأول وكانت أغنية لمطربة تانية، وقلت لوالدى أنا عاوزاها واتحرج من المطربة ولكن أنا كنت متمسكة بيها جدا".

واستطردت: "المنتج اللى عملى الشريط وقتها اتوفى قبل ما نصور الأغانى وكان زمان فكرة الكليب مهمة جدا لأن من غير الكليب محدش هيسمع الشريط كله، وكدة مبقاش في إنتاج ولكن صديقى هشام سرى مدير التصوير قالى عاوز أعرفك على المخرج عاطف الطيب ووقتها مصدقتش".

واستكملت: "قالى أنتى شريطك الجديد في إيه وقلتله عليها وسمعتهاله وقالى ده فيلم قصير وأنا شايف صورة محددة ليها في بالى، مختتمة: "وأنا اللى أنتجت الكليب وقتها وطلب مبلغ كبير بسبب أنه 4 أيام تصوير ومعدات وأكتر من لوكيشن وكان معايا وقتها جزء من الفلوس وبعت عربيتى عشان أكمل وجبت غيرها بعد الكليب"، وجاء ذلك مع النجم والإعلامى أمير كرارة في برنامج "سهرانين" المذاع على قناة ON.

يذكر أن أنغام أحيت حفلًا غنائيًا بدار الأوبرا المصرية بمناسبة عيد الأم وقدمت باقة من أجمل أغانيها.