منال عبد اللطيف: بفكر أقلع الحجاب.. وكتير بيقولولي حد يغطي الشعر الحلو دا

أثارت الفنانة المعتزلة منال عبد اللطيف، جدلا واسعا خلال الساعات الماضية عبر منصات التواصل الاجتماعي، بعد تصريحاتها عن الحجاب وتفكيرها في خلعه بعد سنوات طويلة من ارتدائه.

وقالت منال عبد اللطيف خلال حلولها ضيفة ببرنامج "قعدة ستات" تقديم مروة صبري ويعرض على قناة "ألفا اليوم": : «بفكر أني أقلع الحجاب، ليه الفكرة بتراودني لأن أوقات بتوحشني منال المنطلقة، وأنا بطبيعتي منطلقة وأوقات بتوحشني منال وابقى عايزة انطلق في كل حاجة وأن مفيش حاجة تقيدني لكن سريعًا بقول لأ أنتي تدعي ربنا انه يثبتك لأن دي خطوة مش هينة على طول برجع لدماغي فورًا لكن بتراودني الفكرة طبعًا بتراودني».

وأضافت: «وكل ما بتيجي الفكرة على بالي وأول يا منال اقلعي بقى الحجاب وبعدين أقول لنفسي انتي اخدتي الخطوة وقعدتي السنين دي، والفكرة اللي بتلح عليا أن إن شاء الله لما بنتي الكبيرة فرح تتجوز بفكر أني في الفرح أقلع الحجاب مش عارفة ليه بس الفكرة دي بتزن عليا ومش ضروري ألبس فستان مفتوح أهم حاجة أني أكون منطلقة لأن دايمًا الطرحة بتضايقني وأقعد طول الوقت أظبطها، وبقالي 11 سنة محجبة».

وأردفت: «كل صحابي بيقولولي اقلعي الحجاب وانتي محجبة ليه حرام، وكل الفنانين اللي اشتغلت معاهم قالولي كده في الفترة الانتقالية بتاعتي كلهم بلا استثناء، ولما اتقابلنا في حفلات خارجية بعد كده بره كانوا بيقولولي ليه حد يغطي الشعر الحلو ده».

وتابعت: «أنا بحترم رأي الناس لكن في مناطق شخصية بتاعتي مش بتاعتكم محبش حد يتدخل فيها، ورأي الناس يحترم لكن انا اللي على قناعتي هعمله وطالما مابيضرش حد يبقى محدش له دعوة بيا، وحتى السوشيال ميديا مبخافش منها، وانا مابيشغلنيش غير دائرتي الأولى جوزي ووالدي وبناتي وصديقاتي المقربات غير كده اللي برا دايرتي براحته».