«لأول مرة» .. منى الشاذلي تتحدث عن علاقتها ببناتها الثلاثة وتكشف أسرارا جديدة في حياتها (فيديو)

كشفت الإعلامية منى الشاذلي أسرارًا عن حياتها الشخصية والأسرية تذاع لأول مرة، حيث جاء ذلك خلال لقائها في برنامج "الراديو بيضحك"، مع الإعلامية فاطمة مصطفى على الراديو 9090.

صرحت "الشاذلي"، بأن لديها ثلاث بنات، أكبرهن أنهت دراستها الجامعية، ولا يزال لديها توأم في المدرسة قائلة: "الأم والأب مش مفروض يكونوا ديمقراطيين في التربية، أنت ربنا مستأمنك على طفل صغير يبقى ديمقراطية إيه مع طفل أو مراهق، في أساسيات الأم والأب هم الحراس على تعليمها لأولادهم".

وتابعت: "أنا بيتي الأساس وشغلي هو اللي جنب بيتي، بتخانق مع جوزي طبعا لأن هو الحنين وأنا اللي بشد عليهم، مضيفة: "لازم نربي ولادنا إن مش كل طلباتهم مجابة لازم يفهموا إن كل حاجة ليها وقت وأوان حتى لو نقدر نعملها دلوقت".

واستطردت: "أصعب 3 حاجات في الدنيا على أي ست، إنك تبقي ناجحة وعلى رأس عملك، وإنك تحافظي على أسرتك وبيتك وأولادك في تربية أنتِ ضميرك راضي عنها وتالت حاجة واللي هي الأصعب من ده كله إنك تجمعي الاتنين مع بعض وتحافظي على أسرتك ونجاحك".

وأكملت: "أنا زي أي ست مصرية أصيلة عندي أسرة وأطفال وشغل في جزء كبير منه منافسة وملوش مواعيد، لذلك أنا بتعاطف مع أي امرأة ناجحة في شغلها وبيتها، ومش تعاطف أنثوي لا ده تعاطف موضوعي".

واختتمت الإعلامية حديثها قائلة: "لكن بطمن كل ست إن اللي شايفني بيه ده نتيجة مجهود كبير جدا وإن الرونق اللي على الشاشة ده جزء من الشغلانة أصلا، موضحة: "لازم نبقى طالعين بشكل لائق فكريًا ولغويًا وشكليًا، إنما أكيد أنا في الأجازات مش زي في التليفزيون نهائي بيبقى الشعر ملموم والدنيا عملية جدا زي أي ست في البيت".