عمرو أديب ينتقد سيد عبدالحفيظ: «أنت جواك السواد ده؟»
كتب: محمد عبد الحارس
انتقد الإعلامي عمرو أديب، سيد عبدالحفيظ، مدير الكرة بالنادي الأهلي، بسبب عدم مروره بالممر الشرفي بعد خسارة فريقه أمام الزمالك في نهائي كأس مصر.
وقال «أديب» خلال برنامج "الحكاية": "أيه اللي أنت عملتوا أمبارح يا سيد! ده أنت مدير كورة في نادي كبير، الحركة اللي أنت عملتها مبارح حركة بلدي.. حركة مفيهاش أي أخلاق رياضية".
وأضاف: "يا راجل هو جوا ممر الشرف دول كانوا عايزين منك إيه؟ بيسقفولك بيحيوك... أبتدينا نشوف الحركات الشيك الحركات الحلوة... إنما سيد عبدالحفيظ لا قرر يعمل حاجة لو لاعب عنده عملها كان لازم هو يعاقبو أنما مين حيعاقب سيد عبدالحفيظ؟".
وتابع عمرو أديب: "سيد أنت مدير كورة، ده أنت اللي لازم تعلم اللعيبة القدوة، أنت لازم تكون قدوة، سيد يا سيد أنت جواك السواد ده؟".
وواصل:"متخسر يا أخي، في ناس في الأهلي، مبتعرفش تخسر، هو يأبى: أنا مخسرش.. أنا مدخلش في الممر.. أنا سيد عبدالحفيظ... أنا نادي القرن... أنت لازم تكون نموذج"، حسب قوله".
ودعا الإعلامي المصري رئيس النادي الأهلي، محمود الخطيب، لمعاقبة مدير الكرة لديه، ودعا وزارة الرياضة لفرض غرامة على سيد عبدالحفيظ.
ولم يدخل مدير الكرة بالنادي الأهلي إلى الممر الشرفي الذي قام به لاعبي الزمالك للأهلي بعد فوزهم بلقب كأس مصر.
