«المعاش ما بيكفيش ومحدش بيشغلني».. نعيم عيسى يشكو تجاهل الوسط الفني له

تحدث الفنان القدير نعيم عيسى، عن الكثير من الأمور الشخصية، وسر ابتعاده عن الوسط الفني منذ عدة سنوات، وعلاقته بالوسط الفني.

وأكد نعيم عيسى، خلال لقاء له مع الدكتور عمرو الليثي، ببرنامج "واحد من الناس" عبر قناة الحياة، أنه عانى في السنوات الأخيرة من تجاهل الوسط  الفني، وعدم السؤال عليه، قائلا: " بحس بحسرة كبيرة، ليه أنا انتهيت كده؟ ليه انتهيت عيان ومريض ونايم في البيت، ليه مبخرجش ومبنزلش، ليه محدش بيبعتلي، ليه زملائي مبيزورونيش، ولا مخرجين، منهم لله، أنا الحمد لله عايش بالمعاش".

وأضاف: "مبشتغلش وقاعد بقالي أكتر من 10 سنين، عايش على المعاش أنا وولادي وشقتي إيجار جديد وبجيب علاج بـ2000 جنيه، أنا تعبان عندي بطني وضهري، وجاتلي جلطة في رجلي وقلبي، وركبولي دعامتين، وغيرولي الشريان التاجي، وشالوا المياه من على عنيا وركبولي عدسات، والله قاسيت وما زلت رجلي وجعاني".

وتابع: "دخلت المستشفى مرتين، وأشرف زكي نقيب الممثلين هو الوحيد اللي ساندني في محنتي ووقف جنبي"

وعن سبب ابتعاده عن الفن، قال: "في مسلسل شارع عبد العزيز، لقيتهم جايبني في مشهد واحد وجُمل محدودة، فأنا اضايقت وزعلت وقولت يعني أنا بعد الانتصارات دي كلها، والأعمال اللي عملتها دي كلها، في الآخر يجبوني في مسلسل في مشهد واحد مع عمرو سعد؟".

واستطرد: "فقولت بيني وبين نفسي والله ما همثل تاني وهرجع بلدي تاني، وفعلًا خدت بعض وجيت من القاهرة على الإسكندرية، وقعدت في البيت زعلان، ومحدش كان بيبعتلي خالص".

وأضاف عيسى: "اشتغلت مع عادل إمام، كتير جدًا، كان بيعزني وبيحبني وأنا كمان كنت بحبه، لغاية بقى ما ظهر في سكتنا يوسف داود، وهو في طولي كده، وبدأ عادل إمام يبعدني شوية بشوية ويشغل يوسف داود، وأنا مش زعلان من عادل إمام، ولكن واخد على خاطري منه".