بعد التنمر عليها.. ياسمين عز تُدافع عن هيفاء وهبي: «ربنا خلقها جذابة.. بطلوا حقد»

دافعت الإعلامية ياسمين عز عن النجمة اللبنانية هيفاء وهبي، بعد تداول صور لها ومقطع فيديو، ظهرت فيها بملامح مختلفة، خلال المؤتمر الصحفي الذي سبق حفلها الغنائي بموسم الرياض.

وقالت ياسمين عز خلال تقديمها برنامج «كلام الناس» عبر قناة MBC مصر: «هيفاء عملت حفلة كسرت الدنيا في موسم الرياض، وحماس الجمهور كان غير طبيعي، لكن أعداء النجاح أصروا يبوظوا فرحتها".

وأضافت: «الحاقدين جابوا فيديو متصور بكاميرا موبايل بزاوية من تحت، مع إضاءة وحشة، وزودوا حاجات بفوتوشوب، وخدوا صورة من الفيديو ولعبوا في وشها».

وتابعت: «الست ربنا خلقها جميلة، اللي مسك الموبايل ما تلعبش في الصور وتقولي هي دي، الست في الحقيقة فلقة قمر، وعندها جمال الشكل والروح والكاريزما، كلمني عن الأدب وهي بتتكلم، عن الثقة بالنفس والاحترام في ردها على الصحافة بكل صبر، أو كلمني عن الرزانة ولغة الجسد المظبوطة وحركتها على المسرح، وطلتها المحتشمة لكن في نفس الوقت حلوة وفيها جاذبية، هي ما شاء الله القالب غالب وجسمها لبيس».

واستطردت: «يطلع من الغيرة والحقد اللي عايز يضايقها، عايزاكم كلكم امسكوا الموبايل وصوروا نفسكم بزواية من تحت، هتطلعوا عفاريت وبيطلع شكلنا مش احنا».

واستكملت: «في ثوابت مينفعش نخبط فيها، منها هيفاء وهبي وجمالها، الست دي أمها مصرية جذابة سمراء جذابة روحها حلوة، وأبوها لبناني أشقر عيونه خضرا وحاجة أجنبية، الخلطة دي طلعت حاجة اسمها هيفاء وهبي، مش أنا اللي بقول ده تاريخها اللي بيقول، كون أنها جميلة وبتكسر الدنيا ده رزق من عند ربنا».