الرئيس السيسي يوجه رسالة إلى الإعلام بخصوص المشروعات القومية الجديدة
كتب: بسمة فرج
وجه الرئيس عبد الفتاح السيسي، فى كلمته اليوم بافتتاح المصانع الآزوتية بالعين السخنة رسالة إلى الإعلام قال فيها: «التغطية الإعلامية للمشروعات القومية هتدي للناس إحساس كبير باللى بيحصل، خاصة في ظل الزيادة السكانية، بنتكلم في 20-25 مليون مواطن زيادة سكانية خلال آخر 10 سنين، لو مش عندنا إنتاج يقلل حجم الطلب من برة هتبقى فاتورة الاستيراد هائلة وضخمة"، " هتدي عاوز أقول للى بيسمعني دلوقتي اللى بنتكلم فيه .. مش بنتكلم في مشروع بسيط.. وطلباته من المياه أو طلباته من الأسمدة هتبقي ضخمة.. مش بتكلم خالص على التجهيز كمشروع.. ده موضوع تاني خالص.. ده التوسع الأفقي اللى بنعمله».
جاء ذلك خلال مراسم افتتاح الرئيس مجمع مصانع الأسمدة الأزوتية التابع لشركة النصر للكيماويات الوسيطة، وذلك برفقة عدد من الوزراء
نعمل على زيادة الرقعة الزراعية بنسبة التلت
وعلق الرئيس على كلمة وزير الزراعة وحديثه عن محور التوسع الأفقي في الأراضي الجديدة من خلال مشروعات الدلتا الجديدة ومشروع توشكي ومشروع تنمية أراضي سيناء، قائلاً «بنتكلم عن إضافة 3.5 مليون فدان لإجمالي الأراضي الرزاعية الموجودة وهي 9 مليون فدان.. يعني بنضيف نسبة التلت للأراضي الزراعية الموجودة ودا من خلال مشروعات التوسع الأفقي».
مصنع الأسمدة الأزوتية
وأضاف الرئيس أن مصنع الأسمدة الأزوتية يدعم زراعة 3.5 ملاين فدان، موضحًا: «المصنع ده يدعم زراعة 3.5 مليون فدان.. دول بالكتير نصف العام المقبل أو آخره إن شاء الله، مشيراً بنبذل جهد كبير علشان الرقم ده يتحقق.. 3.5 مليون فدان.. اتعودوا معايا عليها.. إن شاء الله بحاول أكون صادق وأمين معاكم في كل كملة، مش نوعد وخلاص، لما بنوعد بنوعد اللى هنقدر ننفذه».
تنظيم رحلات الشباب
وجه الرئيس عبدالفتاح السيسي أن الحكومة، لتنظيم رحلات للشباب للتعرف على المشروعات الجديدة، قائلا: «من فضلكم اعملوا رحلات لطلبة المدارس والجامعات للمشاريع دي.. عاوز أقول للناس في مصر وللشباب شوفوا اللى بيتعمل بإدين إخواتكم على مساحة مصر بالكامل.. بنتكلم على حجم هائل لما تشوفوه هتطمنوا ومش هنسمح لحد يعبث بعقول شبابنا».
وأضاف الرئيس السيسي خلال افتتاح مجمع الأسمدة الأزوتية في العين السخنة: «خدوا طلبة جامعة أسوان ودوهم توشكي.. وقولولهم دي حاجتكم ولا بتاعت حد تاني؟.. فهموهم إن دي حاجتهم، علينا دور بعيد خالص على اللى احنا بنعمله.. نوري شبابنا وشباب ثانوي.. وده برنامج الحكومة مع أجهزتها والمحافظات والوزرات اللى فيها الشغل ده».
إعادة معالجة المياه
أكد الرئيس عبد الفتاح السيسي، أن الدولة المصرية تسعى إلى إعادة معالجة المياه فى مشروعات التوسع الأفقي، قائلا: «عاوزين نطمن على المياه.. وأنا بقول المشروع الأول والثالث.. مشروعات الزراعة في سيناء والدلتا بنتكلم في إعادة معالجة مياه الصرف الزراعي من خلال محطات معالجة عملاقة.. بنتكلم للناس تسمع ده.. الأرقام كبيرة اوي ومش عندنا خيار تاني.. نكتب عنوان صغير "التنمية الصناعية» أو «التنمية الزراعية».. ده عنوان صغير.. لكن علشان أحققه وأنفذه بياخد وقت وجهد وفلوس كتير».
وأضاف الرئيس السيسي، خلال كلمته في افتتاح مجمع الأسمدة الأزوتية بالعين السخنة: «لما جينا في مايو الماضي نفتتح مجمع الأسمدة الفوسفاتية.. وناس قالت ليه بتصدروا الفوسفات مادة خام.. علشان نعمل ده خدنا 3 سنين.. المجمع الأول خد 3 سنين.. وخدنا قرار الأسمدة الأزوتية.. جزء من الموضوع أنه كان كان عند غاز ممكن نعمل أسمدة أزوتية.. فيه غاز ممكن نعمل بيه.. أنا بقول الكلام لينا كلنا علشان تعرفوا الموضوع ازاي يخرج للنور.. لو مش عندنا غاز مش هنعمل المشروع ده».
الغاز الطبيعي
أضاف الرئيس عبد الفتاح السيسي إن القيمة المضافة للغاز الطبيعى أفضل من بيعه بشكل مباشر، معلقا: «الغاز الطبيعي أفضل استخدام ليه مش إنك تبيعه علشان يخش فى الصناعة ويعمل قيمة مضافة».. ولما أخدنا قرار إنتاج الأسمدة الأزوتية أخدنا 4 سنين علشان نفتتح المصانع دى بالاشتراك مع الشركات اللى بتعتبر أفضل الشركات فى العالم فى هذه المجالات، بجانب أن كنا ضاغطين فى التوقيت علشان ننجز المهمة في أسرع وقت، وفيه ناس بتقول انتوا ليه مش مهتمين بالصناعة؟ ..علشان هناخد وقت وتكلفة كبيرة.. 800 مليون دولار تكلفة المجمع ده رقم كبير علشان تعمل مصانع كبيرة تحقق بيها حاجاتك اللى انت عاوزها ويبقا فيه جزء للتصدير هياخد وقت.. ننتبه إحنا كان عندنا أولويات».
مشروعات الأراضي الزراعية الجديدة
وحول مشروعات الأراضى الزراعية الجديدة قال الرئيس السيسي: "3.5 مليون فدان بنسابق الزمن علشان يخشوا الخدمة في اسرع وقت ممكن.. الـ 3.5 مليون فدان هل مصر خلال 40 سنة فاتت عملت برنامج لـ 3.5 مليون فدان؟.. بنتكلم بما يرضى الله ومقصدش حاجة علشان كده بقول خد الناس تشوف بقا، بجانب إن محطات الرفع في مشروع الدلتا الجديدة ووسط سيناء، تستهدف معالجة مياه الصرف الزراعي لحمايتها من الإهدار كما كان يجرى في السابق بإلقائها في بحيرة المنزلة، تم عمل سحارات لتوصيل المياه لشرق القناة في سيناء، وخطوط مياه لزراعة الأراضي.
أضاف الرئيس السيسي، خلال افتتاح مجمع الأسمدة الأزوتية بالعين السخنة، أنه يرحب بدخول كل المطورين في المشروعات الزراعية، مردفا: "إحنا عملنا البنية الأساسية لمحطات معالجة الصرف الزراعي، وقطعنا المشوار الكبير اللي كان هيكلفك مليارات الجنيهات، وأنا ماقدرش أطالبك بيه.. الأرض الزراعية موجودة وإحنا ماعدناش مشكلة حد يدخل معانا"، ونحن نتحدث عن زراعة حديثة ونظم ري حديثة والاستخدام الاقتصادي للمياه، ومشروع الدلتا الجديدة نفس الكلام، بتجمع الصرف الزراعي وبتتم معالجتها معالجة ثلاثية والموضوع ده محتاج ينفق على تغطيته إعلاميا كويس جدا، وانتو لو شفتوا محطات الرفع وكل محطة منها عمل هندسي محترم بكل معداته.. كل عمل هندسي واحد في محطة من محطات الرفع تكلفته كبيرة جدا علشان تنقل المياه 7.5 مليون متر مكعب / اليوم.
أكد الرئيس عبد الفتاح السيسي، أن الحكومة اتفقت على إعلان أسعار ضمان لبعض المحاصيل الزراعية، قائلا: "احنا كحكومة اتفقنا على إن نعمل إعلان أسعار ضمان لـ 4 سلع، القمح والذرة والفول الصويا وعباد الشمس، ولذلك بطمن الناس، والضمان يعني الحد الأدنى للدفع.. لو السعر العالمي أكثر هندفع أكثر.. لو القمح تعاقدنا على رقم.. ده الحد الأدنى.. طب زاد القمح هنشتري بالسعر وقت الحصاد.. بأكد على النقطة دي لكل القمح والذرة والفول الصويا وعباد الشمس، وأضاف الرئيس بقول للفلاحين والمزراعين، الأرض اللى معاكم غالية جدا جدا جدا جدا استفيدوا منها، بدل التعدي عليها.. العالم كله عنده مشكلة في الإنتاج الزراعي والطلب بيزيد علشان النمو السكاني، أرجو أن نخلي بالنا ونخدم عليها علشان تجيب خير الفترة الجاية.
أقرأ أيضاً ..ننشر كلمة اللواء إيهاب عبد السميع خلال افتتاح «مجمع الأسمدة...
أقرأ أيضاً...«هيئة الدواء» توقع مذكرة تفاهم لتنمية مهارات الصيادلة
