«انطفاء المودة بين الأخوات»..عنوان الحلقة السادسة من برنامج «رميم»

شهدت الحلقة السادسة من البرنامج بعنوان "انطفاء المودة بين الإخوات"، ويهدف برنامج رميم إلى إعادة ترميم روح وشخصية الإنسان من الإنكسارات التي يمر بها في الحياة، والتي يتم عرضها على قناة ON، وعبر صفحة الداعية مصطفى حسني الرسمية عبر قناة يوتيوب.

وفي بداية الحلقة بدأ الداعية مصطفى حسني قائلاً: أحلى سنين عمركوا قضتوها في أوضه واحدة نامين على سريرين لازقين في بعض ،بتبدلوا في نفس اللبس، وبتاكلوا في طبق واحد،حتى المسلسلات والأفلام والبرامج، قاعدين جنب بعض متغطيين ببطانية واحدة لغاية ما يروح عليكوا نومة ودماغكوا لازقة في بعض، ياما عملتوا مشاكل ومصايب وداريتوا على بعض ، إيه اللي حصل طفى المودة ما بينكم وانتوا اخوات؟ وبقى خيركم بس يطلع للغريب،حتى لما بتتقابلوا.. ده لو اتقابلتوا.. قعدتكم بيسوقها الملل وبتشدوا مع بعض على أتفه سبب.

أسباب انطفاء المودة بين الاخوات:

في أسباب طبعًا بتؤدي لانطفاء المودة وهدمها بين الأخوات

1. لو الاخوات اتربوا في بيت فيه المقارنة بينهم وبين بعض.

2. تصرفات وهما صغيرين كان فيها أنانية أو أذى.

3. اختلاف التوجهات لما كبروا مع بعض.

4. وهما صغيرين يشوفوا أبوهم وأمهم علاقتهم وحشة باخواتهم.

علامتين لو موجودين بينك وبين اخواتك.. انت محتاج لترميم علاقتك بأخواتك:

1. وجع في القلب لما اخواتك ربنا يفتح عليهم

2. التفضيل الدائم لنجدة الأصحاب

عواقب انطفاء المودة بين الاخوات:

انطفاء وهدم المودة بين الأخوات ليه مساوئ كتيرة في الحياة وعواقب:

1. كثرة الصدامية بين أبناء الأسرة الواحدة، مش ممكن واحنا قاعدين مع بعض في لمة العيلة اللي بنتقابل فيها مرة في الاسبوع.. كم النظرات الغير المريحة والردود اللي من تحت لتحت اللي فيها إزعاج وإيلام.

2. التعرض أن تكون قاطع للرحم، بعضنا ممكن مايكونش واخد باله إنه صاحب كبيرة من أكبر الكبائر وهي قطع الرحم.. بسبب علاقته المطفية باخواته وهو مسئول إنه يعيد ترميمها ويحييها تاني على قد ما يقدر.

كيف تعيد بناء وترميم ما هدم من انطفاء المودة بين الاخوات؟

3 حاجات هتعملهم علشان ترجع الحياة تاني في الحب والترابط والرحم بينك وبين اخواتك:

1. نية

النية إنك تاخد من النهاردة العزم وربنا يطّلع على قلبك إنك ناوي تصلح.

2. فعل

الفعل هو أخد زمام المباردة.. متستناش.. متبقاش مفعول به.. خليك مبدئ.

3. ترك

اترك رد الفعل البارد لو أخوك ولا أختك هو اللي بدأ بالتواصل.

3 علامات لترميم المودة بين الأخوات (علامات العلاقة العميقة):

1. تعرفوا تتكلموا مع بعض.. في فضفضة.

2. مستوى التفاهم والتغافل.. تعرفوا تفوتوا لبعض.

3. محاولة صنع ذكريات.

لو انت كنت السبب وأخدت خطوة لإحياء ما انطفاء من المودة بينك وبين اخواتك:

1. هتعيش وتُبعث عند الله واصل للرحم.

2. تُبعث مع سيدنا يوسف.

3. الجيل اللي الجاي من العيلة هيطلعوا قريبين من بعض.

والجدير بالذكر أن الداعية مصطفى حسني قدم شهر رمضان الماضي برنامج "القناع" وناقش البرنامج الفطرة الطبيعية الذي خلق الله الإنسان عليها ،وأن الله خلقنا و وضع فينا من صفاته على قدر الإنسان،و إذا سيطر الخوف على أي شخص فسيحجب عنه شخصيته الربانية الصادقة.