«صدمتي النفسية محتاجة علاج».. عارفة عبد الرسول تروي كواليس استضافتها في «رامز نيفر إند»

كشفت الفنانة عارفة عبد الرسول عن كواليس وقوعها ضحية مقلب "رامز نيفر إند" الذي قدمه الفنان رامز جلال في رمضان 2023، وجاء ذلك عبر حسابها الشخصى على "فيس بوك".

كتبت عارفة عبد الرسول منشورًا شرحت فيه الكواليس جاء فيه:  "اتصلت بيا واحده وبكل الحب قالتلى احنا بنفتخر بيكى ونفسنا تحضرى معانا افتتاح محل فى البوليفارد، من فرحتى مسالتش محل إيه، لان كان نفسي أروح السعودية وكل اللى شغلنى الوقت وزنقه رمضان، بس البنت كانت شاطرة وعرفت تدبر الميعاد، اخلص تصوير واطلع ع المطار الحق اخر طياره افتتح المحل وأطلع ع المطار، كده يعنى صد رد ولكم أن تتخيلوا الإرهاق والتعب".

وتابعت: "من أول ماحطيت رجلي فى المطار وأنا بعامل كملكة، خدمه مرحبا وكبار زوار وحوسه، وصلت اخدتنى عربية فارهة إلى فندق هيلتون الرياض ونزلت فى حته نتفه سويت يجرى فيه الخيل وكل حاجه تاتش بقيت خايفة ألمس حاجة تفرقع فى وشى، الروم سيرفز كل شويه يخبطوا جايبين تحيه من مدير الاوتيل وكارت بالإنجليزى معناه إن إدارة الاوتيل فى غايه الانفشاح لاستقبالي، افتح التليفزيون الاقى صورى بفيديو لطيف وقد ايه احنا مش مصدقين انك معانا، تخيلوا معايا بس الحاله اللى انا فيها، الصبح جم بنات كوافير وماكيير والبنت اللى اتصلت بيا واسمها شريفه، بقت تسالنى اسئله عرفت بعدين إنها بتشوف شغلها، اطمنت عليا لأنى جايه من تصوير واصرت انى اطلب اكل واكل قبل ماننزل".

وأضافت: "وصلت قابلتني المذيعة الجميلة كارلا المريحة للعين والقلب، وخضت تجربه السهم والخيل وانا فرحانة وقصيت الشريط بمقص تحفه ودخلت ع المطعم اللى كل حاجه فيه بتلمع قوى والشياكه والجمال وانا بازداد سعاده وفرحه مافرحتهاش عمري، ووصل الشيف الكبير هو انا فعلا استغربت شكله وقولت لنفسى انه شبه الارهابيين اسود ف اسود كدة، وانا مشرئبه قوى وحاسه إنى يسرا ولا مرفت امين، هوب لبست التورتاية، أنتوا متخييلين! طلعت سابع سما ونزلت على جدور رقبتي".

واختتمت عارفة عبد الرسول منشورها: "مش مهم المقلب ..صدمتى النفسية محتاجة علاج فعلا...أنا بحب رامز من زمان وعارفه أنه الواد الشقى بتاع العيله وفرحانه بيه أنه ماسك فى الواد ده ومش بيتغير حتى افلامه شقيه....لكن برضه مش كده...يعنى افرض جرى لى حاجة...أنا طول عمرى صريحة معاكم وفعلاً ماكنتش أعرف وده اللى حصل...أما الست شريفه والسيد رامز ليهم روقة بس اتعالج من الصدمة الاول".

يذكر أن، حلقة عارفة عبد الرسول عرضت في أول أيام عيد الفطر، وكانت وعدت جمهورها بكشف كواليسها فور عرضها.

إقرأ أيضًا: «انا هريحكم منّى».. انتشال جثة شاب من مياه الرياح بعد غيابه 4 أيام