بسبب «عادل إمام».. انقسام بين مستخدمي الفيسبوك حول أداء الإعلامي شريف عامر 

تسبب الفنان الكبير عادل إمام في انقسام مستخدمي موقع التواصل الإجتماعي "فيسبوك" بين مؤيد ومعارض وذلك بسبب مكالمة جاءت مفاجأة من عادل إمام للإعلامي على الهواء مباشرة.

في أثناء مكالمة الفنانة لبلبة للإعلامي شريف عامر في برنامجه "يحدث في مصر"، قام الفنان عادل إمام بالدخول في المكالمة والحديث مع شريف عامر على الهواء مباشرة، وقال نصًا: "أنت بتضحك ليه؟ إحنا لسه قلنا حاجة؟"، حيث قام الإعلامي شريف عامر بالضحك بمجرد سماع صوته في المكالمة.

واستكمل شريف عامر حديثه وقال لعادل إمام أن بناته تعلمن اللغة العربية بسببه عندما شاهدوا أفلامه، ليقوم الفنان بالرد عليه بسخرية قائلا: "عايز تقولي إنك ابن ناس وبناتك مكانوش يعرفوا عربي؟".

ورغم أن الفنان عادل إمام قام بشكر شريف عامر في نهاية المكالمة، إلا أن تلك الدقائق جعلت مستخدمي 'الفيسبوك" ينقسمون من مدافع عن شريف عامر وارتباكه بسبب المكالمة المفاجأة، والبعض الآخر انتقد أداء شريف عامر في المكالمة واصفينه بالمحاور الضعيف.

من جهة الدفاع قالت هند خليفة: "كلكم محاورين كبار وعظماء وشريف عامر لا..المداخلة مفاجئة ومش أي حد هيقدر يفصل وقتها بين كونه إعلامي ومُحب للفنان خصوصًا إنه ليه فترة كبيرة بعيد عن الميديا وكون إن يختص برنامجه بالمفاجأة دي حاجة كبيرة.. وده اللي بالفعل ظهر على شريف أول ما يسرا بلغته إن في مفاجأة وحد هيكلمه.. وهو ارتبك لأن مكنش مصدق نفسه هل  فعلا هيكون عادل إمام".

وتابعت: "أغلب الناس اللي معلقة مشانق لشريف عامر لو اتحطوا في نفس الموقف ممكن يسكتوا خالص أصلا ميعرفوش يتكلموا نص كلمة..الأحكام بتاعتكم ظالمة لأن في اختلاف بين شخص والتاني في تعاملهم مع موقف مفاجئ زي ده.. وشريف عامر مش محاور ضعيف ولا مبتدىء علشان تتكلموا عنه كده".

أما من الجانب المنتقد قال هشام: "شريف عامر جات له فرصة مجاتش لحد غيره ولقى عادل إمام بنفسه معاه ع الهاتف.. الطبيعي يسأله عن سر غيابه الفترة اللي فاتت، ويستفسر منه عن آخر تطورات الحالة الصحية عشان جمهوره قلقان عليه وهل ناوي يقدم حاجة قريب ولا خلاص كده اعتزل..اللي مش طبيعي وغريب إن الأستاذ شريف شخصن الموضوع وجعل نفسه محور الحديث بدلا من عادل إمام وقاله إنت علمت اتنين من بناتي عربي.. فكان طبيعي عادل إمام يرد عليه بسخرية ويقوله إنت عايز تقول يعني إنك ابن ناس وبناتك مبيتكلموش عربي؟".

وتابع: "فالأستاذ شريف كمل في الوصلة الغريبة دي وقاله: شوية!!!!...وانتهى الحديث بدون تقديم أي قيمة مضافة ترد على تساؤلات الناس".

ومن ناحية ثالثة ابتعد البعض عن تقييم شريف عامر، بل أكدوا أن المكالمة طمئنتهم على صحة الفنان الكبير عادل إمام، حيث قال أحد مستخدمي الفيسبوك ويدعى أحمد عزت: "أجمل حاجة في مكالمة عادل إمام امبارح لشريف عامر أنه المكالمة دي بتقول أنه كويس ولسه ذهنه حاضر بخفة دمه، ايفيهاته، وسلاطة لسانه. ' انت بتضحك ليه، إحنا لسه قولنا حاجة" أو " مين ده؟ - دا شريف، ازيك يا شريف" وبعدين وهو بيلسوع شريف" عايز تقول انك ابن ناس يعنى وعيالك مابيتكلموش عربي" وافتكرت بلال فضل وهو بيقول ان ربنا ما يوقعش حد تحت لسان عادل إمام".

وتابع: "المحبط في الموضوع انه تقريبا انسحب من المكالمة وساب يسرا ولبلبة يقفلوا، لما قله قولى بقى انت قيمة عادل إمام عندكم ايه؟ والأستاذ شريف دون بديهة أو معرفة يحكى عن بناته وهربه من المذاكرة، ربما دا كلام لطيف بس في سياق آخر. المهم عايز أقول ولا أظن انى ببالغ يعني أن عادل إمام هو أهم وأجمل ممثل مصرى عرفناه وأكبرهم أثرا كمان وان أفلامه هي جزء أصيل ومضئ من الحكاية الكبيرة للسينما في مصر، وحابب أختم بكلمة لعاصى الرحباني" الوصول للقلب مش هين، يمكن توصل لآخر الدنيا بس ما تقدرش تقطع المسافة الصغيرة لقلب جارك".