أمير طعيمة يطالب صناع الدراما بالاستشهاد بالأزهر والكنيسة في أعمالهم

طالب الشاعر الغنائي أمير طعيمة بعض صناع الدراما الرمضانية الذين استعان بعضهم بأحدث وشخصيات دينية، الاستشهاد بالأزهر الشريف والكنيسة في المسائل الدينية، حيث أنهم أظهروها بطريقة غير صحيحة.

وقال "طعيمة" عبر صفحته الرسمية بموقع التواصل الاجتماعي "فيسبوك": "لما بتعمل فيلم عن حرب الاستنزاف أو حرب أكتوبر فأنت ملزم بأنك تستعين بالمؤسسة العسكرية، لأن مهما كانت معلوماتك استحالة تكون على نفس قدر المعلومات اللي عندهم، لو بتعمل عمل عن المخابرات أو القضاء أو الشرطة أو أي مهنة فإنت بتحتاج جلسات مطولة مع واحد واتنين وتلاته عشان أنت مش هتبقى عارف زيهم".

وأضاف: "ده نفس الأمر بالنسبة للمسائل الدينية أنت ملزم دينيا وأخلاقيا بالرجوع للكنيسة لو أمر يخص المسيحيين ولمؤسسة الأزهر لو أمر يخص المسلمين، ومهما كانت ثفافتك والكتب اللي قرأتها دي أكيد نقطة في بحر الكتب اللي قرأها علماء دي شغلتهم".

وتابع: "نقطة أن الكلمة الفلانية مش موجودة في القرآن ده تبسيط وسطحية مبالغ فيها، الكوكايين والهيرويين والمخدرات عموما مش مذكورة لفظا في القرآن فهل معنى كده اننا نبني أحكام على عدم ذكرها صراحة، تفسير وتأويل الآيات واستنباط الأحكام منها ومن السنة الصحيحة مش عمل فردي تقوم بيه بطولك بالبساطة دي، ولو مش خايف على دينك فارجع برضه للأزهر عشان تعمل عمل مظبوط يفيد الناس".

وواصل: "حاجة أخيرة تصوير الشيوخ طول الوقت على انهم يا أما جهلاء يا أما متطرفين وفي افضل الأحوال انتهازيين ده أمر يجب أن يتوقف، وهتقولي فيه منهم كده هقولك صح، بس تصويرك الدائم ليهم بهذه الصورة بيحول الاستثناء إلى تعميم وبيخلي أجيال تطلع عندها صورة ذهنية عن الشيخ انه حتما كائن ضال مضل وده ما يرضيش ربنا".

واختتم حديثه: "أنت حر فيما تؤمن بيه وهتتحاسب عليه، بس لحظة ما هتصدر الأفكار دي لغيرك فانت ملزم باتخاذ أقصى درجات الدقة والتحري قبل ما تنشره بين الناس".