بالفيديو.. «مربوحة» عن مشهد ليلة الزفاف بـ«الكبير أوي»: «كنت بضحك كل ما اتخيل ريأكشنات مكي»

"أنا مكنتش شايفه أي حاجة وأنا لابسه التايجر حتى الفتحات اللي في راسه كانت ضيقه جدا، ومثلت المشهد كذا مره عشان ابقى عارفه خطواتي"، هكذا بدأت الفنانة رحمة أحمد، حديثها مع الإعلامية فاطمة مصطفى، خلال استضافتها في برنامج "استديو 9090" على راديو 9090.

وتحدثت الفنانة رحمة أحمد، عن تفاصيل ارتدائها أزياء غريبة في مشهد ليلة الزفاف الذي جسدته في مسلسل الكبير أوي 6.

وأضافت: "كنت بضحك تحت راس التايجر أوي بتخيل ريأكشنات مكي كل ما أقوله حاجة، وأغنية عالم الحيوان في المشهد ده كان تاتش جامد جدا".

وقالت "مربوحة"، عن مشهد الرقص: "مش بعرف ارقص شعبي، وكان في حركات عارفه إنها تضحك أوي مكنتش بعرف أعملها، وقعدت اتفرج على فيديوهات وأتدرب كذا مرة، وفي الآخر أستاذ جندي قالي اطلع سنجه من ورا ضهري وألف في الأوضة كلها أكسرها واستمتعت بتكسير الديكور".

وأستطردت: "ماكنتش متوقعة رد الفعل ده على الحلقة، ومكنتش متوقعة رد فعل أصلا، هو الواحد يعمل اللي عليه وسيبها على الله، أتبسطت أوي بردود الأفعال من كل الناس".

وعن مشهد ارتداء الفنانة رحمة أحمد زي الممرضة الذي أثأر جدلا واسعا وفهم البعض له بطريقة خاطئة، قالت: "إن أنا أوضح حاجة معناه إنها مش واضحة، ولكن المشهد ده واضح بدليل أن الناس كلها ضحكت عليها وده الريأكشن الصح".

وأكملت: "دايما بلاحظ لما بروح اكشف في مستشفى الطريقة اللي الممرضات بينادوا بعض بيها، ولما صورت مشهد الممرضة لقيت نفسي بنده زيهم وأقول: يا لبنى فين مريض 307، وبالنسبة لتعليق المحلول فده كان مكتوب على الورق من الأول"، مؤكدة احترامها الشديد لمهنة التمريض، لافتة:"طبعا دي مهنة تُحترم بشكل كبير جدا، ودي حاجة عظيمة أوي".

وتشارك رحمة أحمد الفنان أحمد مكي في مسلسل"الكبير قوي"، الذي يعرض ضمن السباق الرمضاني الحالي، حيث تدور أحداثه في إطار كوميدي، حول عمدة إحدى القرى، والمحيطين به، وتغيب عن هذا الجزء دنيا سمير غانم التي شكلت مع مكي ثنائية ناجحة في الأجزاء السابقة، في دور "هدية" زوجته.

المسلسل من بطولة أحمد مكي، ورحمة أحمد، وهشام إسماعيل، ومحمد سلام، وبيومي فؤاد، وعدد من ضيوف الشرف، وهو من إخراج أحمد الجندي، وتأليف مصطفى صقر، وإنتاج سينرجي.