عمر كمال: محمد فؤاد تخلى عني عندما طلبت مساعدته

قال مطرب المهرجنات عمر كمال، إن الفنان محمد فؤاد تخلى عنه عندما طلب المساعدة منه ليدخل مجال الغناء، مضيفا: «أنا واحد غايته في الحياة إنه يقابل محمد فؤاد وعايزه يديني أي كتف إن شاء الله أشتغل عنده في البوفيه. هتعلم منه أي حاجة».

وتابع عمر كمال، خلال بودكاست «فايق ورايق» مع الإعلامي إبراهيم فايق: «كنت بروح كل يوم عند بيته ومبيجيش، وبعدين لما جه رمضان، لقيت واحد طالع يمسح العربية، عرفت إن محمد فؤاد جاي، فرحتله وقلتله أنا بعشقك وبحب فك وبشتري الشريط الأصلي مش المضروب، وبقعد في أول صف في حفلاتك في دريم بارك.. قالي ربنا يخليك يا عمورة تسلم يا حبيبي».

وواصل: «قلتله صوتي حلو ونفسي تسمعني، قالي سمعني، فغنيتله أغنية قلبي خبي لـ عبدالحليم حافظ، قاللي جدع، صوتك حلو وييجي منه، يلا ربنا يوفقك، ونادى على ولد يطلعله العربية.. قلتله يا أستاذ أنا جايلك عشان تديني كتف، قاللي يا عمر روح قدم في برامج أصوات كتير دلوقتي، لكن أنا مش بقدم حد».

واختتم: «هو برضه كان عنده حق. دلوقتي بيحصلي نفس الموقف وبقول نفس الرد وبقولهم اعمل أغنية ونزلها على التيك توك هتنتشر واعمل محتوى كويس».