ابنة شويكار: «فؤاد المهندس أب عظيم وكان عايز يمنحني اسمه»

كشفت منة الله الجواهرجي ابنة الفنانة الراحلة شويكار عن علاقتها بالفنان القدير الراحل فؤاد المهندس وابنيه أحمد ومحمد، وروت موقف مؤثر جمعها بزوج والدتها.

وقالت منة الله الجواهرجي: "فؤاد المهندس كان إنسان جميل علمني حاجات كتير اوي في كل حاجة، خاصة تحمل المسئولية والالتزام"، ولما كنا بنشوفهم ملتزمين وبيحترموا مواعيدهم وشغلهم ومسئولين مسئولية كاملة، طلعنا كدة، نتحمل مسئولية ونحترم مواعيدنا والناس، ونعمل أي حاجة بإخلاص وحب، طلعنا احنا التلاتة كده، أنا وأحمد ومحمد".

وأكدت ابنة شويكار أنها تعتبر أحمد ومحمد فؤاد المهندس بمثابة أشقائها، قائلة: "احنا أكتر من الأخوات بدليل أن العلاقة مستمرة وربنا يخلينا لبعض، وبناتي بيقولوا لأحمد ومحمد يا خالو، وكانوا بيقولوا لفؤاد المهندس يا جدو، وعمر ابن محمد بيقولي يا عمتو، وحقيقي المثل اللي بيقول رب أخ لم تلده أمك ده صحيح، وأنا مقتنعة بده".

وكما تحدثت عن حالة التناغم والحب الهائل بين والدتها شويكار وفؤاد المهندس قائلة: "هو اشتغل مع غيرها وهي اشتغلت مع غيره، لكن لما الإتنين بيشتغلوا مع بعض بتبقى حاجة محصلتش، وشويكار كانت تعتبر فؤاد المهندس بمثابة أستاذها وحبها الأول والأخير، وكانت تطهو الطعام له يوميا حتى وفاته، وكان حب العمر كله زي ما بيقولوا وكانت دايما تقول هو نص التفاحة بتاعتي وهما نصين اتخلقوا لبعض".

وفي سياق متصل، حكت موقف إنساني مؤثر لا تنساه مع زوج والدتها فؤاد المهندس بعد حصولها على شهادة الثانوية العامة، قائلة: "كان فاضلي درجتين على كلية الإعلام، وهو كان وقتها موظف كبير في كلية التجارة وفي 5% بيدوهم لأولادهم، وأخدني ورحنا قابلنا عميد الكلية ورئيس جامعة القاهرة ورحبوا به جدا، وقال لهم إنه عايز يدي الدرجتين لبنته، ولما شافوا ورقي لقوا إنني مش بنته".

واستطردت: "ولما روحنا البيت قال لماما أنا هنزل أغير اسمها، عشان أنا بنته، ازاي يبقى مينفعش؟ الموقف ده لا يمكن أنساه وكل ما أفتكره أعيط لأنه زعل، وأنا محبوش يزعل"، موضحة أن والدتها رفضت فكرة تغيير اسمها إلى منة الله فؤاد المهندس، مراعاة لشعور أسرة والدها الراحل، وجاء ذلك خلال مداخلة هاتفية مع الإعلامية إنجي القاضي في حلقة استضافت فيها محمد نجل الراحل فؤاد المهندس في برنامج "مساء dmc".