الرئيس السيسي: «عندي 17 مليون مشترك بديهم الكهرباء أقل من نص تمنها»
كتب: بسمة فرج
تطرق الرئيس عبد الفتاح السيسي لأزمة الكهرباء خلال السنوات الماضية، قائلا: "الناس فى أوروبا بتغلي الكهرباء وفقا لتسعيرها، أنا عندى 17 مليون مشترك بديهم الكهرباء أقل من نص تمنها حتى الآن".
وأضاف الرئيس السيسي خلال الجلسة الختامية للمؤتمر الاقتصادى مصر 2022: "لو أقدر أساعدك هساعد الكل .. بحاول أخلى اللى إحنا بنعمله مفيد للمستثمرين.. أنا معاكم ومتوافق وداعم ومش كلام دبلوماسي.. مستعد لحوار شفاف وعميق مع أى حد فى أى تخصص".
تحدث الرئيس عبد الفتاح السيسي عن الأوضاع الاقتصادية للدولة المصرية، قائلا: "والله والله والله فرصة.. كل شركات القوات المسلحة معاكم.. كل شركات الدولة اللى موجودة معاكم.. بس مش تقولي نخفض العمالة الزيادة اللى موجودة واديني الشركات.. أنت لما بتعمل شركة خاصة بتختار الناس بدقة وتحوكم.. لكن احنا معانا ميراث.. دي مجتمعات وأسر.. اوعي تخلي غضبك من سوء الأداء يتحول لعداوة مع اللى بيقوموا بسوء الأداء.. أوعى تكره الفقير.. أوعي تكره الفقير.. اكره الفقر.. ومش تكره الفقير".
وأضاف الرئيس السيسي، خلال كلمته في الجلسة الختامية للمؤتمر الاقتصادي: "لما عملنا المساكن للمناطق الخطرة.. قولنا للناس مش هناخد فلوس.. قولنا هناخد صيانة علشان نحافظ.. حد يصدق إنى أتابع.. الناس بتدفع ولا لأ.. بتابع بشاير دفعت ولا .. الأسمرات دفعت ولا .. أهالينا دفعت 300 جنيه".
