بعد حفله أمس.. حلمي بكر يُهاجم ويجز: «ملوش علاقة بالفن.. وخطر على أمن البلد» (خاص)

شّن المُوسيقار حلمي بكر، هجومًا على ويجز بعد سوء التنظيم الذي تم في حفله أمس الجمعة، وفتح البوابات المؤدية إلى مكان الحفل بشكل مفاجئ وعشوائي ليدخل الجميع دون تنظيم مما أدى لحالة من التكدس.

وقال «حلمي» في تصريحات خاصة لـ«العاصمة»: «التفاف العيال دي حوالين ويجز وغيره دة بداية الجريمة، ودة ضد أمن البلد، ومين ويجز دة اللى يجيله كل الجمهور دة، هو أية اللى حصل وأية اللى جرى».

وأضاف: «ويجز دة ملوش علاقة بالفن.. بس الشباب بيلتف حوالية لأننا للأسف باستمرار بنجيب سيرته هوا وغيره من النوعية دى، لكن لو بطلنا نتكلم عنهم هيموتوا، وأنا واثق أن ويجز دة سعيد جداً من أمبارح لأن الكل بيتكلم عنه، بل أنه بقى حديث المدينة، وما حدث جريمة ضد الدولة ويجب منع كل الناس اللى على شاكلة ويجز».

واستكمل: «الراب هو أحد الخطوط اللى ممكن تكون قريبة من الغناء ولكنها ليس غناء بالمعنى المعروف، وأنا شايف أننا خلصنا من المهرجانات طلع لنا الراب، وللأسف أحنا سايبين الحاجات المهمة في البلد ومؤتمر المناخ في شرم الشيخ وعمالين نتكلم على تافة وكلام فاضي، ياريت نفوق لأن العيال دى عايزة تضيع البلد».