أيمن نور الدين يكتب: «اللى يحب منة بصحيح .. يخليها تخاف على صحتها»

 كتب: أيمن نور الدين
 
أيمن نور الدين يكتب: «اللى يحب منة بصحيح ..  يخليها تخاف على صحتها»
مبدئيا بإخلاء سبيل الفنانة منة شلبى من سراى النيابة
من المتوقع ان القضية تحفظ لإن على حد معلوماتى محضر الضبط شابه بعض الأخطاء اللى على حد علمى كفيلة انها تخلى المحامى يبوظ القضية من أساسها .. ويمكن عشان كده النيابة اخلت سبيلها بكفالة
وشفنا ازاى ان منة باتت فى بيتهم ليلتها
يعنى الحمد لله الكفالة لحسن الحظ اتدفعت من بالليل .. وده يدل على ان السلطات كانت غير متعنته اطلاقا فى حق منة ولا حد مستقصدها ولا متبلغ عنها ولا زعلت حد و الكلام الأهبل اللى اتقال ده
دى راكبة اتفتشت فى مطار ولقوا معاها حاجات ممنوعة
بجانب ان قرار النيابة كان عادل فى حق المتهمة ولا تعليق على احكام القضاء المصرى غير بكل فخر واعتزاز
لكن مش هى دى المشكلة .. المشكلة فى ردود الأفعال اللى حصلت فور نشر المواقع الصحفية خبر القبض على منة
وبالطبع انا معنديش مشكلة نهائى فى موجة التعاطف الجارفة تجاه منة الإنسانة والفنانة ..
على اعتبار انها فنانة جميلة وموهوبة ومحبوبة وكل حاجة وانا عن نفسى باحب تمثيلها وأدوارها
لكن التعاطف ده مش معناه ان البعض يهاجم دور الصحافة
اللى موجود من قديم الأزل وفى العالم كله
وللعلم للى مايعرفش ..
الصحافة دايما بتبقى نور ونار
يد تحنو وجلاد فى نفس الوقت
الصحافة اللى اتشتمت عشان خبر منة
هى فى حقيقة الأمر من ساهم فى صنع نجومية منة شلبى سواء فى ابراز موهبتها واعمالها الفنية وجوائزها
وهى هى الصحافة اللى نشرت مؤخرا خبر القبض عليها لما غلطت
هى دى الصحافة .. وستظل
االباحثة عن الحقيقة
مرآه للواقع
جميلا كان أو قبيحا
وبعدين ما هى هى الصحافة اللى كتبت قبل كده عن العديد من النجوم اللى بيتعاطوا المخدرات واتقبض عليهم على مر التاريخ واتسجنوا و حتى اللى ماتوا بالمخدرات
ايه الجديد يعنى ؟ واشمعنا منة لا ؟
الصحافة دى مش بس صحافة اليومين دول اللى فيه ناس عايزاها للمدح فقط
وعلى فكرة هى دى نفس صحافة عمالقة زى مصطفى أمين وهيكل وابراهيم سعده وسمير رحب ومكرم محمد احمد وموسى صبرى وعادل حمودة وغيرهم كانوا رؤساء تحرير لصحف بتنشر كل أنواع الجرائم للمشاهير على حد سواء
ومنها حاجات مخجلة
ارجعوا لارشيف الصحافة المصرية وشوفوا القصص والحكايات والقضايا
ولا حد وقتها قال لمصطفى أمين مايصحش ولا قال لأحمد بهاء الدين عيب عليك
وكانت صحفهم ومجلاتهم مرآه للواقع
اما طبعا الصحافة العالمية فمافيش الكلام ده نهائى
الفنان او النجم اللى يغلط بيتعلقله المشانق حتى لو واخد اوسكار
ولا حد طلع وقال ده واخد أوسكار ماينفعش نطلعه بيتعاطى
ولا الكلام اللى شفناه ده
يمكن حوالى 10 نجوم عالميين كتبت الصحافة الأمريكية والأوروبية عن تعاطيهم المخدرات لحد الموت بالمخدرات
ولا العالمية بتبقى فى السينما بس لكن الصحافة المصرية لما تبقى زى الأجنبية تبقى وحشة
الهجوم اللى حصل عالصحافة من قبل بعض الناس فى الوسط الفنى والإعلامى والصحفى ده عيب اوى وخيابة .. الحقبقة
ومالوش وصف غير انه
كيل بمكيالين فاضح
ومبدئيا فكرة الكيل بمكيالين بالنسبة للتعامل مع أى مواطن فى الصحافة والإعلام أمر بيسقط عن صاحبه اى مظاهر رحمة وملائكية ومبصدقهوش ومش بابلع كلامه .. ولا باصدق حتى انه بيحب منه بجد
لإن المبادىء لا تتجزأ .. والرحيم رحيم عالكل
والرحمة مش نقاوة .. لناس ناس
واكتر ناس المفروض تتحاكم هى الناس اللى بتقول المفروض المشاهير ماننشرش اخبارهم السلبية عشان مشاهير
بالعكس ده المفروض المشهور يبقى أكثر الناس التزاما وتحملا للمسئولية لانه قدوة والناس بتقلده
وبتبين ان جميع المواطنين متساويين فى الحقوق والواجبات
طب ما الأحسن بقى نعمم عالكل من قبيل العدالة ويتمنع نشر الجرائم
ياما بقى نلغى دور الصحافة ونقلم اظافرها ونخليها للمدح فقط ويطلع قوانين بده ونبقى غير صحافة العالم كله
اشمعنا العيل الغلبان لما بيتمسك بسيجاره بانجو بيتفضح فى صفحات الحوادث والمشاهير ؟
ماهو بيتكتب اسمهم وبيتحط صورهم
ده فى انهى شرع وفى أنهى منطق وفى أنهى دين ده ؟
مانمنع قسم الحوادث من الصحافة
والكارثة الأكبر ان كتير من الناس دى مكانتش حتظهر اى تعاطف لو اللى اتمسك ده كان على هواهم حتى لو مشهور
اقسم بالله ده حقيقى
وساعتها الكلام كله حيتغير
يعنى بيحللوا الكتابة عن فلان ويحرموها على علان
مثلا .. لما اصالة اتمسكت بمخدرات محصلش هجوم على الصحافة وقتها
ولا لما اتكتب على دينا الشربينى وانسجنت حد قال عيب مايصحش والستر وكده
ماينفعش الواحد يقرا عشرات البوستات فى اوساط الميديا هجوم على الصحافة
الصحافة مش هى الجمارك اللى فتشت منه ولا هى السلطات اللى قبضت عليها ورحلتها النيابة
ولا الصحافة ليها علاقة بالقضية اللى لسه مخلصتش واللى حيبقى فيها حكم قاضى سواء لصالح منة او مش لصالحها
انتوا بكلامكم ده كإنكم بتلوموا القانون المصرى وجهات تنفيذه مش بتلوموا الصحافة " الحيطة المايلة "
انتوا كإنكوا بتقولوا ليه ماسبتوهاش تدخل بالماريجوانا
او بتقولوا ازاى تقبضوا على منة من الاساس ؟
وكلام بقى من عينة الستر احسن ومن فضح مؤمنا وارحموا من فى الأرض وياساتر انتوا مابتصدقوا وغيره وغيره
شفت كلام عجيب .. كإننا فى عزبة مش فى دولة
ماهو ده الستر يامتنورين ومتعلمين
الستر الحقيقى هو اللى يخلى الشخصية العامة قبل الشخص العادى يفكر الف مرة قبل مايستهين بالسلطات ويتعاطى مخدرات ويشتريها من بره ويجيبها معاه وفاكر انه مش حيتفتش
صحيح فيه حد واحد بيتمسك والصحافة تكتب عنه لكن الحسنات اللى مش ظاهرة ان فيه الف واحد بيخافوا يعملوا زيه و بالتالى بيتستروا بالفعل
اه فيه الف واحد حيخافوا يعملوا كده
الستر انك تحس انك فى بلد فيها قانون .. الجميع قدامه سواء
الستر ان يبقى عندك صحافة بتشتغل عند الحقيقة
الحقيقة وحدها .. مش بتشتغل عند الأهواء والكيل بمكيالين
وفلان حلو وفلان كخة
هى دى الصحافة . علمهولنا كده وطلعنا لقيناها كده وحتفضل كده من بعدنا
شاء من شاء وأبى من ابى
وعلى فكرة الصحافة مش بتنشر عاطل على باطل
انما بتنشر اللى متوثق فى محضر رسمى بس
ولو بنكتب كل اللى بنعرفه .. كنا نشرنا ماتشيب له الولدان
وان كان عالستر والرحمة فاحنا ضربنا الرقم القياسى فى الستر والرحمة اقسم بالله والحمد لله
انما صحافة فلان حبيبنا ماتكتبوش عنه وفلان غلس اكتبوا براحتكم .. لااا دى مش صحافة دى حاجه تانيه عيب انى اقولها
اللى بيحب منه بصحيح .. بدل مايشتم عالصحافة ..
عقلوا منة وخلوها تتعظ من اللى حصل وتخاف على صحتها قبل صورتها
وتبطل ماريجوانا لو القضاء أثبت ذلك .. " المتهم برىء حتى تثبت ادانته "
عشان ده بيلحس المخ واللى بياخده بيموت بيه او بيتجنن
اللى بيحب منه بجد . يقولها تبطل مخدرات لو بتتعاطى مخدرات مش يشجعها ويقول دى شكولاته وحلاوة وحاجات بتتباع عادى فى السوبر ماركت
انتوا بحملة التعاطف دى أسأتوا للوسط " الا من رحم ربى "
انه بيتعاطى وبيدافع عن التعاطى
اومال فين حملات انت أقوى من المخدرات
روحوا شوفوا الناس العادية بتقول ايه عالوسط عالفيس بوك
دنتوا طلعتوا منه مناضلة ياجدعان
ده احنا لسه مخلصناش من قضية شيرين .. هوب طلعت قضية منة
يعنى اكبر نجوم فى مصر مضروبين بالبلاوى دى
وعلينا اننا نعترف ان بعض الفنانين فى الوسط للأسف مضروبين بالمخدرات ولازم نتصدى للموضوع ده
وأخيرا انا اتمتى ان منة تاخد براءة من القضية دى
ومحدش يتمنى لحد حاجه وحشه
لكن انا مش مع الحملة الشرسة اللى حصلت
تحيا الصحافة المصرية
تحيا العدالة بين كل المواطنين