«مكنتش عارف أتخطاها ولا أشوف غيرها».. محمد حماقي يكشف تفاصيل انفصاله عن زوجته وعودته لها

كشف النجم محمد حماقي لأول مرة عن كواليس انفصاله عن زوجته وعودتهما مرة أخرى، مُشيرًا إلى أن الطلاق أحيانا من الممكن أن يكون مفيدًا للطرفين حتى يشعر كلا من الطرفين بقيمة الآخر.

وقال حماقي: "احنا انفصلنا أنا وزوجتي سنتين ومفيش حد خد باله ولا عرف، وكنت حريص إني مقولش عشان ميحصلش تجاوز، اللي حصل كان مرحلة عدم تفاهم وتتخين دماغ بدون داعي وافتكرنا أن الحل الأمثل إن كل واحد ارتاح من التاني".

وتابع: "لكن اكتشفنا إن مش ده الحل أنا قعدت سنتين مش عايز أقابل ولا أشوف حد غيرها ومش عارف أتخطاها، وأوقات كتير بالليل كنت بفكر إنها ممكن تتجوز وأزعل وأضايق طب أنا ليه عامل كده في نفسي".

واستطرد: "الطلاق أوقات كتير بيكون مفيد ولكن عرفنا قيمة بعض ورجعنا وأنا بحبها من كل النواحي بحبها من عقلي ومقتنع جدًا وبحبها بمشاعري والحمد لله إننا رجعنا".

وعن تغيير محل إقامته من التجمع الخامس لـ أكتوبر، قال: "مراتي من سكان الزمالك، ونقلت من مدينة نصر لـ أكتوبر علشان معزلهاش عن أهلها وأخواتها، خاصة إني بسافر كتير ومش طول الوقت موجود، حسيت إن ده ظلم لو عزلتها"، وجاء ذلك خلال استضافته في رأس سنة 2023 مع الإعلامية والفنانة إسعاد يونس في برنامج "صاحبة السعادة" المذاع عبر شاشة قناة DMC.

يذكر أن محمد حماقي تزوج من نهلة الجارحي في 2011، وأعلنا طلاقهما لمدة عامين، ليعلنا عودتهما من جديد في 2016، وأنجبا ابنتهما الوحيدة فاطمة.

إقرأ أيضًا: محمد حماقي: عمرو مصطفى مش سلس في التعامل وعنده جنون الفنانين بس بزيادة