ممدوح موسى لـ«العاصمة»: «ياسمين عز أوفر.. ومعظم اللي بيعملوا برامج ستات معقدة» (فيديو)

تحدّث الإعلامي ممدوح موسي، عن رأيه في المهرجانات الفنية والجوائز التي يحصل عليها المشاهير، هذا إلى جانب رأيه في الجيل الجديد والجيل الذي تعامل معه.

وقال «ممدوح»، في ندوة بـ«العاصمة»: «تواجدي في مهرجانات فيها جوائز، مسألة مش مقتنع بها، لأن أي حد معدي ممكن يأخد جائزة وأي حد له معارف يأخد جايزة».

وأضاف: «حاليًا ما بحضرش أي مهرجان لأن كان عندي موقف مع مهرجان الإذاعة والتلفزيون كلموني وقالولي هتأخد جائزة وبلغوني إن هأخد الجائزة الذهبية.. ولما وصلت علشان استلم الجائزة بمجرد وصولي اعتذروا ليا وقالولي إن الجايزة هتبقى الفضية بدل الذهبية.. ولم أعترض وجالي مكالمة أخرى وأنا داخل القاعة، وبلغوني أنها أصبحت برونزية وأيضا لم أعترض، وفوجئت بمكالمة جددية وبلغوني أن الجائزة أصبحت شهادة تقدير وأنتظرت استلمها.. والمفاجأة أنني في النهاية لم أحصل على شئ وحتى الشهادة استخسروها فيا.. ومن بعدها ما بقتش أفكر أروح أي مهرجانات وكلها مجاملات».

وعن رأيه فيما تقدمه المذيعة ياسمين عز من جدل بسبب انحيازها للرجل، ونوعية هذه البرامج، قال ممدوح موسى: «ياسمين عز لما كانت بتعمل البرنامج بتاعها العادي كنت بتفرج.. ولكن لما دخلت في الموضوع ده وركزت في التريند ما بقتش بتفرج ودلوقتي بقلب البرنامج لما بعدي عليه.. لأن اللي بتعمله كتير وأوفر، ومش كل الرجالة حلوين ومش كل الرجالة جدعان، وبصراحة معظم اللي بيعملوا برامج عن الستات ستات معقدة ومش بكلم عن حد معين».

وكشف عن رأيه في الفرق بين الجيل الجديد والجيل السابق، قال: «الفرق بين الجيل اللي اتعملت معه والحالي.. النجاح زمان كان صعب.. دلوقتي ممكن تعملي حاجة تبقى تريند.. وبقى في ممثلين يطلعوا يقولوا أي حاجة علشان يبقوا تريند.. اللي بيفضل العمل الجامد والفنان اللي بيحترم نفسه وبيحترم جمهوره والفنان المغرور مش بيكمل».