زينة: أبو أولادي راجل محترم ومتكفل بيهم والداخل بنا خارج

أوضحت الفنانة زينة، أن مشكلتها الأخيرة مع الفنان أحمد عز هي مشكلة شخصية، لافتة إلى أنه لا يصح أن يتدخل أحد في هذه المشكلة التي بينهما، بالإضافة إلى أنها تحترمه لأنه في النهاية والد أبنائها.

وقالت "زينة": "دي مشكلة شخصية بيني وبينه، المشكلة كبرت لأن إحنا معروفين، حتى الجمهور دخل فيها، فمحدش ليه أن هو يتدخل أو يتكلم، في الآخر أنا وهو فيه بينا ولاد، وأي حد داخل بينا فهو خارج في الآخر، لأن هيلف الزمن والمواقف وأنا لو وقعت في أزمة أكيد هو هييجي، مش علشاني أنا، علشان خاطر ولاده، وأنا لو لقيته في أزمة أنا أول واحدة هجري عليه".

تابعت: "هو راجل كويس جدا ومحترم ومتكفل بولاده وكويس مع ولاده جدا، فننهي الموضوع ده ومنتكلمش فيه تاني، لأن أنا زهقت وكل الناس زهقت، موضوع شخصي يا جماعة عيب، الموضوع خلص انتهى، هو كويس وأنا كويسة الحمد لله ملكوش دعوة بينا محدش يجيب سيرة الموضوع".

واستطردت: "واللي بيقول رأيه يروح يقول رأيه في حياته، كل واحد حياته خربانة ميجيش يتدخل في حياتنا إحنا حتى لو الموضوع بقى بيقولوا رأي عام، خلاص، الكلام ده لكل الناس اللي ضد واللي مع، مش عايزين حد يتدخل، ولا هو عايز يدخل حد في حياته ولا أنا عايزة حد يتدخل في حياتي ومتدخلوش في مشكلة متخصكوش وملكوش إن أنتوا تتكلموا لأن أنتوا ماتعرفوش حاجة".

اختتمت زينة حديثها قائلة: "أنا مصدرتش حاجة للإعلام ولا هو الحقيقة، هو الإعلام تدخل في الموضوع وبدأ الناس تتدخل، أنتوا مين بجد؟ بس اخرسي أنتي وهي وهو، محدش ليه دعوة بينا إحنا حرين، ناكل بعض، هنتصالح، نقطع بعض، في بينا ولاد، محدش ليه دعوة، هو راجل محترم وأنا ست محترمة محدش يتدخل في حياتنا ومحدش يقول رأيه”، خلال حوارها مع الإعلامية أسما إبراهيم، في برنامج ، المُذاع عبر شاشة “القاهرة والناس".

إقرأ أيضًا: بهذه الإطلالة.. زينة: «أنا مش إنسانة كاملة.. بس لذيذة أوي»


 

ومن ناحية أخرى، يعرض حاليًا للفنانة زينة مسلسل "جعفر العمدة" ضمن الموسم الرمضاني الحالي والذي حقق نجاحًا كبيرًا، وهو من بطولة الفنانين: محمد رمضان، مي كساب، إيمان العاصي، هالة صدقي، عصام السقا، أحمد فهيم، منة فضالي، طارق النهري، وغيرهم، ومن تأليف وإخراج محمد سامي.

وتدور أحداث المسلسل في إطار اجتماعي، حول شخصية "جعفر العمدة"، الذي يتزوج بـ 3 سيدات، ويقوم بالبحث عن ابنه المفقود من زوجته الأولى "ثريا" والذي تم اختطافه من المستشفى قبل أكثر من 19 عامًا، ويلتقي "عايدة" التي تقدم دورها الفنانة زينة، ويطلب منها الزواج في ظل شروط معينة.