بعد 23 عاما على قضيتها وإثبات براءتها.. وفاء مكي لـ«العاصمة»: عمري ضاع وادمرت والمجتمع ظلمني زي ميار الببلاوي
كتب: شروق خالد
وفاء مكي تكشف أسرارًا جديدة عن قضيتها
وفي سياق متصل، كشفت وفاء مكي عن حالتها المادية الصعبة عقب خروجها من السجن بقولها: «مكنش عندي تلاجة ولا تمن علاج ابني عمر، وابني كان محتاج حقن بمبلغ كبير والنقيب أشرف زكي بعتلي مبلغ كتر خيره وساعدني».
واستكملت: «والد البنات كان بيعمل كده عشان يبتزني ويساومني على شقتي، الراجل ده جاتله فلوس كتير وإعانات بسبب اللي عمله فيا، متابعة ببكاء شديد: «بقوله حسبي الله ونعم الوكيل في كل من بغى عليا وظلمني، أنا ادمرت واتحطمت عمري مش هيرجع تاني، كل اللي هقوله عليه العوض ومنه العوض، عوضي عليك يارب»
وبالدموع.. اختتمت وفاء مكي حديثها قائلة: «لو البراءة ظهرت قبل كده، كنت هبقى في حتة تانية، أنا كنت في حالة صعبة جدا، وقضيت 3 سنين سجن ظلم، ومعرفش مين اللي عمل معايا كده أو اتسبب فيه، أنا اتبهدلت واتشتمت من ناس كتير وعمري ضاع ولكن ده كله كان ظلم بعد إثبات براءتي أنا مش عايزة حاجة من حد وحقي عند الله».
سيد شعراوي يفجر براءة وفاء ويكشف الكواليس
ومن جانبه أكد المصور الصحفي سيد شعراوي، أنه على علم بامتلاك ميار الببلاوي دليل البراءة، وحاول إقناعها بإخراج الدليل للعلن، مشيرًا إلى أنه عندما ظهرت براءة وفاء مكي لم يعتذر من أساءوا لها وقت القضية.
وقال شعراوي لـ«العاصمة»: «وفاء هي اللي وجهتني وقالتلي خليك ورا هند عاكف وميار الببلاوي، وساعتها حاولت اتواصل مع ميار ومكنتش بترد إلى أن ردت وقولتلها إن الموضوع إنساني ولازم تتكلم، مضيفًا: قالتلي أنا أكتر واحدة عارفة إن وفاء مكي بريئة من الاهتمامات اللي اتوجهت لها، وإن البنات راحولها والاتنين كان عندهم قراع إنجليزي وده مرض معدي، فهى ماشتهم وقتها».
وواصل: «تلف الأيام والست اللي جابتلها البنات دي قالتلها إن والدهم كان بيهديهم منوم وبيحرقهم عشان يبتز وفاء مكي وتتنازل عن القضية، مختتمًا حديثه: في زمايلها سبوها وشتموها في الوسط الفني بسبب قضيتها، الناس دي فين لما ظهرت براءتها، أتمني ضميرهم يصحي زي ما ضمير ميار صحي».
القصة الكاملة لقضية وفاء مكي
وعادت قضية وفاء مكي للظهور مرة أخرى بعد أن اتهمت الخادمتين بأنهما كانتا تتاجران في المخدرات في لقاء تليفزيوني، وقالت إن أهلهما لديهم سوابق جنائية، وقالت إنهما أصيبتا بمرض جلدي أدى لتساقط شعرهما، ولأن المرض خطير خشيت على نفسها من نفس المصير، فقررت تسريحهما بعد 3 سنوات من العمل.
وأضاف مكي: أنا مش مجنونة عشان أعمل فيهم كدة، أبوهم اللي كان بيخدرهم ويحرق جسمهم عشان يبتزني، أنا معلمتش فيهم حاجة".
وأكدت أن الفنانة ميار الببلاوي كان لديها دليل براءتها لكنها خشيت من إظهاره، بسبب تلقيها تهديدات بقتل نجلها حال وقوفها مع وفاء مكي، وقد أخبرتها بذلك وهي في القفص.
من هى وفاء مكي؟
وكانت بداية وفاء في التمثيل عام 1985، وتحولت من تأدية الأدوار الصغيرة للبطولات بعد أدائها شخصية "مهجة" في مسلسل "ذئاب الجبل" أوائل التسعينيات، واتهمت مكي في قضية تعذيب خادمتها عام 2001، وتم الحكم عليها بالسجن عشر سنوات مع الشغل والنفاذ، ثم تخفيفه بعدها إلى 3 سنوات لتخرج عام 2004.
وشاركت وفاء مكي في العديد من الأفلام المصرية مثل: "لحم رخيص" و"ضد الحكومة" و"المشهد الأخير" و"إلا ابنتي" و"البنات والمجهول" و"الشاهد الأخرس" و"الجمالية"، كما شاركت في مسلسلات "ذئاب الجبل" و"والراية البيضاء" و"بوابة المتولي" و"سور مجرى العيون" و"نسيج العنكبوت" و"بنت سيادة الوزير".
