أمير مرتضى منصور: أنا وعيلتي فرضنا السيطرة على الزمالك وده مش عيب

علق أمير مرتضى، المشرف السابق على الكرة بنادي الزمالك، على ما تردد من أقاويل أن الزمالك عزبة مرتضى وأولاده قائلًا: "فكرة إن فيه عيلة مكونة من 3 أشخاص بيشتغلوا عمل عام في مكان واحد ومسيطرين على النادي، دي حاجة حقيقية ومتعيبش، المكان اللي بنديره يا نبسط عليه سيطرة حقيقية يا إما منبقاش موجودين، لأن الناس جابتنا عشان ده، وده اتكرر في أندية كتير زي الإسماعيلي وآل عثمان، وحصل في الأهلي مثال كابتن صالح سليم وكابتن طارق سليم، ودول أساطير بالنسبالي".

وتابع خلال استضافته ببرنامج "أسرار" مع الإعلامية أميرة بدر المذاع على قناة النهار: "أنا مش شايف إن لازم يبقى عندنا عقدة لو حد نجح في مكان فيبعد أسرته، ما ممكن احنا الإتنين عشان متربيين في بيت واحد على حب النادي مثلًا نديله كتير، وصرفت ملايين ووصلت لمرحلة اني بصرف اللي محوشه كمان، وكنت بحلم إني العب في المكان كورة فبقيت بدير الكرة في المكان كله، وكنت بعمل مكافآت من جيبي للاعيبة، ولو لاعب ما عايز احمسه بطريقتي أو عنده ظروف خاصة وهو لاعب صغير كنت بعمل كده".

وعن فكرة انتماء اللاعبين لبعض الأندية قال: "فكرة الانتماء دي في المدرجات بس، أما مستوى المحترفين واللاعيبة ده بالنسبه له أكل عيش وهيموت نفسه ويجري يبوس التيشيرت، لكن جوه قلبه بيحب مين عمرنا ما نعرف، ومثال كابتن حسام حسن من أساطير الاهلي ولعب في الزمالك واجتهد وكان ساعتها زملكاوي من جواه، لمن اللاعيبة مع الوقت بتنسى قصة الانتماء دي، وإمام عاشورحاليًا يتظاهر انه أهلاوي، لأنه هيكسب وهياخد مكافأة فا عمره الافتراضي هيطول، ودي حاجة في العالم كله".

واختتم قائلا: "يعني لويس فيجو كان كابتن برشلونة وراح ريال مدريد والجمهور هدده بالقتل، الجمهور بس اللي بيشجع وبيتحرق دمه، ولو جالي الاهلي أو عرضوا عليا مش هروح ولا أقبل، لأن السياسات مش هبقى فاهمها وانتمائي، ومعنديش رؤية غير للزمالك بس، وشيكابالا مضى في الأهلي زمان ومقدرش يلبس التيشيرت، وفيه ناس بتعرف تبقى محترفين أكثر في التعامل".

اقرأ أيضاً: مرتضى منصور يهاجم مجلس الزمالك: «غرامة كهربا اتدفعت بتعب ولادي»