أمير مرتضى منصور يفتح النار على كهربا: «هرب من الزمالك وراح نادي تاني»

علق أمير مرتضى، المشرف السابق على الكرة بنادي الزمالك، على أزمة محمود كهربا قائلًا: "كافئت لاعيبة كتير كنت بقوله هات جون واديك شيك بـ 100 ألف تصرفه بعد الماتش، زي كهربا وأوباما ومصطفى محمد، وكهربا كان لاعب مهم جدًا في فترة 2018، قبل ما يهرب، وفيه حكم محكمة بيقول إنه هرب، هو شاف إن عقده باطل والنادي شاف أن عقده ممتد، وهو كده دي وجهة نظره".

وتابع: "ورحنا الفيفا وهو خسر القضية أول درجة، واتحكم ضده بـ 32 مليون جنيه ما يعادل ساعتها 2 مليون دولار، وهو استأنف عشان يقلل المبلغ أو يلغيه، واحنا استأنفنا عشان نزود المبلغ ونحوله بالدولار، والمحكمة الرياضية أيدت حكمنا بـ 2 مليون دولار".

وأضاف: "أنا اللي عامل القضية من أولها لأخرها، وكهربا طلع في حلقة تليفزيونية مع سيف زاهر والفيديو موجود في القضية، وسأله يا كهربا عقدك فيه قد إيه في الزمالك، وقاله انا عقدي فيه سنتين وجددت سنتين، وسيف زاهر سأله تأكيدًا يعني العقد فيه 4 سنين، قاله آه، وهو اعترف وخسر القضية بسبب الفيديو ده، وكهربا اتحط في ظروف صعبة، خليته يعتمد على نفسه وقوته، معرفش الاهلي وقف جنبه ولا لا".

واستطرد: "أنا معترض على حاجة، إنه في الآخر دفع بالمصري، رغم احنا شفنا الدولار كان بيحصل فيه إيه الفترة اللي فاتت، وضرر الزمالك لما كهربا هرب، كلف النادي أكتر من 2 مليون دولار، اشترينا بديل له اللي هو محمد أوناجم بمليون ونص دولار، وبن شرقي ب 400 ألف دولار، فالتوتال في التحويلات كان حوالي 2 مليون دولار غير عقود اللاعبين".

واختتم حديثه: "والموضوع مش إنسانيًا، دي حقوق، وقبل ما يمشي قلتله أجدد لك، قالي لا وهعمل شكوى ومن اللحظه دي مش هتشوف أي مشكلة، وهرب بعدها على طول".

وجاء ذلك، خلال استضافته ببرنامج "أسرار" مع الإعلامية أميرة بدر المذاع على قناة النهار.

اقرأ أيضاً: مرتضى منصور يهاجم مجلس الزمالك: «غرامة كهربا اتدفعت بتعب ولادي»