شيرين عبد الوهاب: «ممكن تطلبوا إيدي من طارق مدكور»

كشفت المطربة شيرين عبد الوهاب عن تفاصيل علاقتها بالموزع الموسيقي طارق مدكور، مشيرة إلى أنه مسئول عنها سواء في حياتها الشخصية أو المهنية خلال الفترة القادمة. 

وقالت شيرين: "اتعرفت عليه وأنا عندي 17 سنة وفاكرة إنه أخدني للمسرح وقت مسرحية (حزمني يا) واتعرفنا على محمد هنيدي والنجوم الكبار، وطارق ليه عالم أي حد يدخله في أي وقت يجد نفس المعاملة وهو شخص لا يتغير، إنسان مخلص وواضح جدا لو نلخصه في كلمتين فهو عنده شغف لكل حاجة جديدة ومش بيسمم أفكاره بمعلومات خاطئة حتى لو كان مسلسل أو كتاب، هو شغفه المزيكا وأصحابه".

وتابعت: "طارق إنسان مهتم بتفاصيلك ومش عايز يسيبك فريسة لأي ثقافة، حتى هو اللي بيختارلي الأفلام من ثقافة معينة عشان أشوفها، ولو حبيت أنك تعيش في دنيا مفيهاش كذابين ولا ناس بوشين عيش في عالمه، واللي بيني أنا وطارق أكبر من الشغل".

وعن إمكانية عودة شيرين للتعاون مع شركة النيل للإنتاج الإذاعي، في إنتاج جديد، قالت: "أنا عندي شركتي وفكري ومنهجي وبعد كل الوقت ده من حياتي وعمري لا ينفع أكون ملك للغير ولكن مفيش مانع نتعاون مع بعض مجددا، ولكني شرفت بالتعاون مع نجوم إف إم".

إقرأ أيضًا: فتش عن حسام حبيب فى حفل شيرين عبد الوهاب بمهرجان قرطاج بتونس

وفي سياق متصل، قالت شيرين مازحة: "ممكن تطلبوا إيدي من هو المسؤول حاليا عن كل الاتفاقيات لو عايزين تتفقوا على أي عمل".

واختتمت شيرين عبد الوهاب حديثها قائلة: "أنا وعدت الجمهور أني جعانة غنا وعايز أملى الدنيا غنا وهقدم للناس ألبوم وأغاني أحلى حاجة في الدنيا، وأوعدكم أركز في اللي جاي وأسيب الماضي ورايا"، وجاء ذلك في مداخلة هاتفية ببرنامج "حروف الجر"، مع الإعلامي يوسف الحسيني على "نجوم إف إم".

يذكر أن، شيرين عبد الوهاب تواصل اختيار وتسجيل أغنيات ألبومها الجديد، الذي يشرف عليه الموزع الموسيقي طارق مدكور، لتقديمها بشكل جديد بعد غيابها الفني الأخير.

وتستعد شيرين خلال الأيام المقبلة لطرح أغنية "المترو" من كلمات أمير طعيمة، ألحان عمرو مصطفى وتوزيع نابلسي.