عمرو أديب ينعي مفيد فوزي: «احنا فقدنا مدرسة.. واتعلمت منه إزاي أكتب عنوان صحفي»
كتب: شروق خالد
عبر الإعلامي عمرو أديب عن مدى حزنه لرحيل الإعلامي الكبير مفيد فوزي، مشيرًا إلى أنه تعلم على يديه فن كتابة العناوين الصحفية إلى جانب تأثره الشديد بمدرسته الصحفية والتلفزيونية.
وأضاف: "احنا فقدنا مدرسة.. لم يعد لدينا صحافة قوية، إمتى آخر مرة شوفنا حوار قوي، أو مقال يتداوله الناس، أو كاراكتير يقلب الدنيا زي اللي كان بيعمله صلاح جاهين، كانت الدنيا تتقلب بمقالات مصطفى أمين وأحمد بهاء الدين، متسائلا: "فأين الصحافة اليوم؟!".
وتابع: "89 عامًا رحلة طويلة، ويوم ما تفقد حد زي مفيد فوزي تقول اتعلمنا، وأنا من الناس اللي بتحب اتعلم، أما أشوف حاجة اتعلمها، أنقشها، أعمل زيها، ومتكسفش أقول اتعلمت من حاجة أو كتابة أو أسلوب، امتى أضع النقط والفصلة، مضيفًا: "وكان دايمًا يقولي إيه كل العنوان ده يا حبيبي".
إقرأ أيضًا: ربطه والده بالحبال.. رحلة مفيد فوزي من قسوة الأب إلى حديث المدينة
واستطرد: "واتعلمت منه ازاي العنوان يبقى قصير، كنت أقعد جنبه، وعيني دايمًا على ورقه، وكان دايمًا يكتب بألوان، فكنت بشوفه وهو بيحط خطوط على معلومات وجمل عشان ناخد منها عناوين فرعية، كان بيجي الشغل منه خالص مخلص".
واختتم الإعلامي عمرو أديب حديثه قائلا: "كان حظي أني قعدت جنبه فترات طويلة، وكنت بقاوح معاه وأناكفه في شغلنا سوا، لكن طبعًا اتعلمت منه وكان ليا الحظ بالتتلمذ على يديه"، وجاء ذلك في برنامجه "الحكاية" على قناة mbc مصر.
عمرو أديب: أنا إتعلمت كتير من الأستاذ مفيد فوزي
— الحكاية (@Elhekayashow) December 4, 2022
تقدر تشوف الحلقه كامله على شاهد (اتفرج ببلاش)https://t.co/LayFZOKEEy #الحكاية#MBCMASR pic.twitter.com/szxiozBso6
وكان الفقيد قد وافته المنية صباح أمس الأحد، إذ أعلنت ابنته الإعلامية حنان مفيد فوزي عبر صفحتها الرسمية على موقع التواصل الاجتماعي فيس بوك تفاصيل تشييع جنازة والدها.
وكتبت حنان مفيد فوزي: «بابا سافر السما عند ربنا.. صلاة الجنازة على روحة الطيبة اليوم الأحد الساعة 12 ظهرا فى كنيسة المرعشلى بالزمالك والعزاء يوم الاثنين الساعة 6 فى قاعة كنيسة المرعشلى بالزمالك».
