سمسم شهاب: «لم اعتزل الفن.. ومجبر على الغناء في الملاهي الليلية»
كتب: نسرين إبراهيم
كشف المطرب الشعبي سمسم شهاب حقيقة ما تم تردد خلال الساعات الماضية بشأن اعتزاله الفن وتحريمه له، ورغبته في التفرغ للعبادة.
وظهر سمسم شهاب في بث مباشر عبر صفحته بموقع التواصل الاجتماعي «فيس بوك»، وقال فيه: «أنا فوجئت بخبر، لما صحيت من النوم، وكنت بالأمس في مؤتمر خاص بمسلسل أخر الزمن اللي بغني التتر بتاعه، وسألني أحد الصحفيين سألني بيقوللي الفن وإلى آخره.. قولتله مش راضي عن الوضع اللي حاصل، قاللي وبتهاجم بتوع المهرجانات وبتدعو للفن الكويس، قلتله آه طبعًا، قاللي ما أنت بتغني في ملاهي ليلية».
وتابع سمسم شهاب: «أنا كان ردي إني مُجبر، إن شاء الله أحاول أبعد، فقاللي ده حرام.. قلتله لو هنتكلم عن الحلال والحرام كتير من الأئمة حرّموا الغناء.. إدعيلي إن ربنا يأخد بإيدي وأبعد نهائي، هو المشروع المستقبلي اللي بفكر فيه».
وأضاف سمسم شهاب: «قالي يعني هتعتزل.. قولتله ده موضوعي اللي جاي عايز بس أقف على أرض صلبة عشان مبقاش حرقت نفسي وخسرت حاجات كتير جدا، قمت لاقيت مواقع كتيرة وكبيرة بتكتب إني بعتزل الفن نهائيا، بس الحقيقة إن ده قرار ناوي أخده في المستقبل، فيه حاجة في دماغي عايز أعملها عشان لما أبعد أكون واقف على أرض صلبة عشان مرجعش تاني».
وأوضح سمسم شهاب: «ظروف الحياة صعبة على الكل.. حبيت أوضح إن الكلام ده كلام مش صحيح وخبر غير صحيح، وللأسف زعلان من الصحفي جدا جدا مش عارف ليه عمل كده، وواخد على خاطري جدا منه، أنا بحترم جدا الصحفيين وبتعامل بكل احترام، وهذا ما يستحقونه والمفروض يحصل، لكن المفروض التصريحات متتحرفش».
وتابع: «يا جماعة خبر اعتزالي الفني مش صحيح، وده فعلا قرار جوايا ولكن مش دلوقتي لما أقدر أقف على أرض صلبة، وأكيد ربنا هيعني على ده».
