دعاء فاروق تُكشر عن أنيابها لـ إحدى المذيعات: «مسنودة على كوم فلوس فقط»

أثارت الإعلامية دعاء فاروق، جدلًا واسعًا بعد هجومها على إحدى المذيعات دون ذكر اسمها، واتهامها بفرض نفسها على الساحة الإعلامية بأموالها وافتقارها للموهبة واللباقة والخبرة والثقافة.

وكتبت دعاء فاروق عبر حسابها الرسمي على «فيسبوك»، قائلة: «عاوزة أعمل مقارنة سريعة أعمق من فكرة المذيعات بس ده علي سبيل المثال لا الحصر.. وكملوا معايا للآخر..  في مذيعة زى مثلا نجوى إبراهيم أو فريدة الزمر أو سهير شلبي أو سلمي الشماع أو سناء منصور .... إلخ.. لستة الأسماء الكبيرة لا تنتهي ممكن نفضل نكتب فيهم لآخر السنة.. ومذيعة تانية بدون ذكر أسماء ???? بتجيب نجوم صف أول في برنامجها النجم الواحد بياخد فوق المليون جنيه في الحلقة،  تمام ؟؟ .. تمام».

اقرأ أيضا.. بعد ظهوره بساعات مع ياسمين صبري.. خبير تجميل يُشعل نار...

وأضافت: «المقارنة كالتالي.. فيه ثقافة ولباقة وشياكة وخبرة وتاريخ Vs فلوس كتير وإنتاج سخي.. الفلوس لو خلصت والحنفية لو اتقفلت مش هيبقي فيه المذيعة دى لأنها مسنودة علي كوم فلوس فقط.. التل لو أختل هي هتقع لأن مفيش حاجة تسند غير الفلوس فقط.. لا فيه ثقافة ولا فيه فكر ولا فيه تاريخ ولا فيه خبرة ولا فيه كاريزما!!.. إنما حبايبنا اللي ذكرت اسمهم فوق عايشين ومحفورين في الذاكرة حتى لو البرامج وقفت والفلوس وقفت.. هم كانوا في الريادة من غير فلوس أصلا.. هي مصر في الستينات كانت رائدة بالفكر والموهبة عمر ما مصر كانت مواردها فلوس طول عمرها مواردها بناسها وناس مصر وتواجد المصريين علي مر العصور والسنين هم اللي بيساعدوا أي دولة في أنها تتحط علي خريطة الثقافة والفنون».

 وتابعت: «مع كامل احترامنا للجميع من غير مصر مش هيبقي فيه خريطة فنية أصلا في المنطقة العربية.. فيه رمانة ميزان اسمها مصر.. فيه مواهب عبقرية وخفة دم وكاريزما رباني كده مخلوقة هنا في الأرض دى من أيام الفراعنة لغاية اللحظة اللي بكتب فيها حالا.. ربنا خص وحبي المصريين بموهبة متفردة وتوليفة فكر وثقافة معجونة بروح مصرية مش عند حد متأصلة في البلد دى مع تاريخ عظيم مسنودين عليه.. الريادة والتألق والنجومية في الدم مش في البنك.. ودائما وأبدا القاعدة الأزلية».

اقرأ أيضا.. محمد التاجي لـ«العاصمة» : «أنا بخير.. وهشارك ماراثون رمضان...

واستكملت: «الفلوس تبحث عن النجوم والنجوم تجيلهم الفلوس لغاية عندهم عشان يوافقوا يقفوا جنب أصحاب الفلوس ليمنحوهم بريق من نجوميتهم وليس العكس.. نحن نملك الأغلي والأثمن.. تخيلوا كده أي مسرح كوميدي بدون النجوم المصريين ممكن يضحك مين ؟؟؟؟ تخيلوا أي أغاني بدون شعراء مصريين.. تخيلوا أي ألحان بدون موزعين وملحنين مصريين.. تخيلوا أي مقرئين أو مداحين أو منشدين بدون الأصوات المصرية.. إحنا عندنا الجوهرة اللي تتاقل بفلوس كتير قوي .. أصحاب الجوهرة هم اللي يحطوا رجل علي رجل ويبيعوا بيع غناوة لأن اللي بيشتري محتاج».

واختتمت: «إنت عندك الجوهرة وهم عندهم الفلوس.. عبد الحليم حافظ وأم كلثوم بدأوا وهم من أفقر الناس ماديا ولكنهم من أغني المواهب اللي اترمي تحتهم الأموال والألماظات وكان الملوك والأمراء من يسعون خلفهم وليس العكس.. إنتو قيمتكم كبيرة يا مصريين أوعوا تقللوا منها احنا هنفضل نتتاقل بالذهب والالماظ والناس هي اللي تدفع فينا الغالي والثمين ويبعتوا يطلبونا عشان نقف جنبهم وننجحهم وليس العكس.. مصر هي الجوهرة.. هتفضلي الأغلي والأثمن دائما».