رضوي الشربيني للرجال: روح بلغ لو واحدة اتحرشت بيك أو شربتك حاجة صفرا ومتتكسفش

عقبت الإعلامية رضوى الشربيني على رسالة لأحد الرجال من متابعي برنامجها "هى وبس"، يتسأل فيها عن سر مهاجمتها للرجال الخائنين، مؤكدًا أنه لا يخون إلا إذا تم وضعه تحت ضغط من الإغراءات الشديدة أو أن سيدة ضحكت عليه، وجاء ذلك على حد قوله.

وقالت الشربيني: "كلنا عارفين أن الرجالة بتخون، يا أما فيه راجل فرفوش بيحب الستات، يا أما مبدأه التعدد، ولكن أنه يخون تحت ضغط دي أول مرة أسمعها، فلو فيه أي واحدة بتتحرش بيك، أو شربتك حاجة صفرا وبتضغط عليك بطريقة معينة، روح بلغ عنها وماتحطش نفسك تحت أي صغط".

وأضافت: "قانون التحرش مش للستات بس، للرجالة كمان، روح بلغ عنها واحنا كلنا في ضهرك، وأوعي تتكسف، لكن فكرة أن البحر يحب الزيادة فأحب أقول لحضرتك أننا في 2023 الحكاية بقت معكوسة عشان الرجالة بقت عاملة زي بوفيه الأكل المفتوح اللي الأكل بقاله من 4 لـ 5 ايام عليه، كل واحدة تعدي تأكل وتمشي وفيه اللي بطنها بتوجعها فمش بتكرر الأكل منه مرة تانية، وفيه اللي متعودة على الأكل الحمضان ده".

واستطردت: "لو الضغوط دي لأن أنت زي الطفل مع الستات اللي بيمارسوها عليك، فأشمعني بتتحول لراجل على مراتك وتفضل تشخط وتزعق وتجعر والجيران يفضلوا يسمعوك، واللا ماما طلعتلك أن ألف مين يتمناك، كده روح اتعالج عشان تكون راجل مش متاح أو محترم احتمال برضة".

وأكدت رضوى الشربيني في ختام حديثها: "على فكرة أنا مش بهاجم الرجالة الخاينين، لأنهم مش هيتحملوا مني دقيقتين، أنا بس بيتطلب مني أعلق على حاجة من حد أو حد بيأخد رأي مش أكتر".