هالة الدمراوي تكتب: إسأل أمك !
كتب: متابعات
التهانى مهمه ما فيش كلام .. والهدايا بتفرح و تسعد ..
و النبى عليه الصلاة والسلام قال : تهادوا تحابوا ..
و اللمه الحلوه اللي معموله مخصوص علشان الأم مطلوبه و ضروريه ولابد منها ..
بس الأهم من كل دة إنك تتأكد من رضا أمك عليك .. تتأكد إنك سبب سعادتها أو رضاها أو طمأنتها أو فرحتها فى الدنيا !
تتأكد إنها فرحانه و فخورة بيك ..
تكون واثق إنك عند حسن ظنها ال 364 يوم فى السنه مش بس يوم عيد الام لأنك كسفتها بطرحة صلاه ولا بحلتين إنت المستفيد بيهم برده وإنت اللي هتاكل منهم !
إسأل أمك إيه اللي نفسها فيه و إعمله .. إيه اللي بيزعلها و حاول علي قد ما تقدر حتى ما تعملوش قدامها ..
إسأل أمك عايزة إيه فى عيد الام .. يمكن يكون طلبها أسهل و أرخص مليون مرة من اللي عمال تحوش له و تدور عليه !
يمكن تكون سعادتها فى إنها تشوفك ساعه .. أصل إنت مابتلحقش تعدى عليها و لو ساعه فى الشهر !
و يمكن يكون فرحتها فى إنها تشوف ولادك اللي ما عندهومش وقت غير للنادى و أعياد الميلاد ! لكن تقولهم نروح لامى يقولولك : لا إحنا بنزهق !
بيزهقوا من اللي خلفتك يا دكر و ربتك و لحم كتافك من خيرها لغاية ما بقيت أب ملو هدومك !
"أمك طخينه اوى يا ممتاز"
معلهش يا ستى إستحمليها لو ده مشكلتها الوحيده !
إستحمليها يا سمباتيك يا شياكه يا إله الجمال يا محور الكون !
خللي عيد الأم غايه .. خلليه تصحيح مسار .. إملاه حب و عاطفه ..
يا جماعه عيد الام بقي مفارش وحلل ومقشات وطرح وإيشاربات وتورت وجاتوهات ... رخيصه أو غاليه .. النظريه واحده !
يوم يغلب عليه الإرهاق الجسمانى و المادى أكثر بكتير من الحب العادى !
أقولك .. لو لسه مش فاهم ..
إسمع إغنيه "ست الحبايب" بصوت الوسيقار محمد عبد الوهاب .. خلود الأغنيه دة بالذات نابع من صدقها الشديد ..
محمد عبد الوهاب كان دايما بيسأل أمه طول السنه عايزه إيه !
إسأل أمك .. قبل ما ربنا يسأل أمك عنك ..
وقبل ما يسألك انت عنها !
