إشادة بسعيد جميل في أول حلقة بعد عودة رضوى الشربيني

حقق الإعلامي سعيد جميل نجاحا كبيرا في أول حلقة بعد رجوع الإعلامية رضوى الشربيني ببرنامجها "هي وبس"، واستطاعا سويا أن يقدما حلقة ممتعة تتعلق بالعلاقة بين الرجل والمرأة، حيث جاوب سعيد جميل على سؤال رضوى الشربيني عن ماذا يريد الرجل من المرأة، بشكل حاز على إعجاب الكثيرين من الرجال وتفاعل رواد مواقع التواصل الاجتماعي مع ما قاله، وحقق العديد من الإشادات.

وقال الإعلامي سعيد جميل: ناس كتيرة طلعت تتكلم عن الراجل وطلباته من الست، وناس كتير سفهت من طلبات الرجالة، ولدرجة أنهم طلعوا الراجل مجرد كائن عايز يقعد يتفرج على واحدة بترقص أو حد يقعد يهويله، وحاجات كتير غريبة من اللى بنسمعها.

وأضاف "جميل": الراجل عايز لما الدنيا تضيق بيه والظروف تبقى صعبة يلاقي واحدة ست واقفة في ظهره، وتقوله الفلوس اللى أنت سبتها هتقضي بقية الشهر، ولو الدنيا عجزت تنزل تبيع ذهبها علشان تقف جنب جوزها في أزمته، عايز لما يمرض يلاقي ست قاعدة تحت رجلية بتعيط وتقوله سلامتك يا حبيبي ياريتنى كنت أنا.

وأوضح: الراجل عايز لما يشتكى لمراته باللى جواة مايتعيرش بعد كدة، وعايز لما يغيب في شغله يعرف أن بيته فيه أسد محاوط على العيال ومحدش يشوف شعرة منها، ودى طلبات الرجالة يا أستاذة رضوى مش حاجات تانية، ودى طلبات الرجالة المصرية المحترمة لأن الراجل المصري عمره ما كان غريزي لكن هو راجل بطل وبيحب أسرته وأولاده.

كما تطرقا في الحديث عن مشاكل الخطوبة، ومشاكل التفرقة بين الأبن الذكر والابنة الأنثى، ومشكلة الراجل البخيل على زوجته، بالإضافة إلى الحديث عن الشك بين المرأة والرجل، كما ردا على اسئلة الجمهور التي أرسلها لهما على مواقع التواصل الاجتماعي الخاصة بالبرنامج.