خالد عليش عن حكم رؤية ابنته: تاريخي في ظل ظروف قانون الأسرة
كتب: مؤمن نصر
تحدث خالد عليش باستفاضة عبر حسابه الشخصي على الفيسبوك بعد مناصفة القضاء المصري له في قضية رؤية ابنته، وعلق خالد عليش على الحكم الصادر لصالحه قائلاً: "النهاردة أنا خدت حكم تاريخي يارب يتنفذ علي خير، وتاريخي لأنه احسن حكم ممكن اخده في ظل ظروف قانون الاسرة السيئ لحين تعديله، واللي طلع الحكم قاضي مش واحد صاحبنا ف ده معناه ان الراجل قره و فهم و بيدي لكل واحد حقه، لكن جه الوقت اللي اقول فيه اللي جوايا، حسبي الله و نعم الوكيل".
وأضاف: "أنا خصيم لكل واحد أو واحدة حتى يوم الحساب ساعدو بشكل مباشر أو غير مباشر أني ما أشوفش بنتي بطريقة إنسانية، كل حد كبير أو صغير جريت وراه بالمكالمات عشان أشوف اي حلول ودية، حتى الحركات والجروبات النسوية اللي بيدافعو عن الست وخلاص، اي حد بيكتب تعليق وهو مش فاهم حاجة، فاض بيا الكيل والعمر بيعدي واستحملت الكثير من الاتهامات الباطلة وعلاقتي ببنتي بتبوظ يوم بعد يوم، وأنا ملتزم بكافة الالتزامات المادية ناحيتها من أول يوم كاملة وزيادة كمان عن المستوي المادي والاجتماعي اللي عايشين فيه ومع ذلك استحملت كتير وماردتش".
واستكمل حديثه: "أنا لا حول لي ولا قوة حاولت مع كل الحلول الرسمية والغير الرسمية، تعبت من اللف في دوائر مغلقة، تعبت من نظرة والدي ووالدتي المريضة اللي نفسهم يشوفو حفيدتهم ومش قادر أعملهم ده، أنا أوحش رجل في العالم ولكن ما استحقش أني ما يكونش عندي فرصة أتكلم وأخرج معاها وأفسحها عشان علاقتي بيها تبقي كويسة، محدش يقولي أنت السبب عشان سيبت ماماتها، أنا ووالدتها كان في بينا عشرة طيبة وأيام كتير حلوة ولكن لم يحالفنا التوفيق في النهاية وكل شئ نصيب والانفصال كان برغبتها قبل رغبتي".
وأوضح خالد عليش: "محدش يقولي ما أنتا كنت زوج وحش و وأنا يمكن مكنتش أحسن زوج برغم أني عملت اللي عليا كتير واجتهدت كتير عشان أسعد الطرف التاني ولكن ده مش معناه اني انسان وحش ومستحقش فرصة تانية ومستحقش أشوف بنتي، محدش يقولي ما أنتا مبسوط واتجوزت تاني، أنا فعلا الحمدلله زي الفل ومبسوط أني أخدت فرصة تانية ربنا يكرمني فيها وأكون إنسان ٍأفضل واستمتعت بحق ربنا سبحانه وتعالي والمجتمع أداهوني أني أتجوز تاني بعد انفصالي رسمياً بأكتر من سنة بس مش معنى كدة أني أرمي طفلي مع أمه ومطلوب مني أنساه، محدش يقولي ما أنتا كنت بتشوفها".
وألمح: "أنا فعلا مع بداية الانفصال كنت بشوفها ساعات قليلة في الأسبوع بس مع اي تصرف ما يعجبش ماماتها تقولي أصل البنت مش فاضية عندها عيد ميلاد عندها تمرين ووسط شروط كتير منها متتصورش معاها وتنزل ليها صور - متوديهاش عند أهلك - تيجي عيد الميلاد لوحدك بدون باباك أو ماماتك، حسيت في الوقت ده أني لازم استخدم التعاقد اللي بيني وبينها اللي بيقول أني أخد البنت يوم في الأسبوع ولكن القانون أداني حق الرؤية الطبيعي الغير إنساني لطفل، فضلت ٥ شهور في مساومات أني معملش تنفيذ لحكم الرؤية حفاظا علي البنت ولكن ماماتها صممت وبعد التنفيذ كان مهانة ومذلة للطفلة وليا بعدها مبقتش أروح وبعت انذار رسمي ليها بكده ومازلت في الإجراءات القانونية الجديدة بعد فشل المحاولات الودية اللي الحمد لله النهاردة خدت فيها حكم منطقي ومناسب".
وأردف: "محدش يقولي ما أنتا ما بتصرفش عليها ومبهدل ماماتها في المحاكم، برغم أن مش ده الموضوع بس الحمدلله الفلوس اللي الام طلبتها كنفقة ومصاريف بتوصل كل أول شهر بدون اي محاكم من أول يوم حصل بينا انفصال رسمي بدون محكمة بعقد اتفاق بينا ولو حصل دخول محاكم في أول الخلاف ف الام اللي بدأته وده بالتواريخ مش بالكلام، موضوع أن في مصاريف زيادة بتطلب بشكل مبالغ فيه دي قصة تانية فيها نقاش وحوارات كتير ومع ذلك قولت أنا عندي استعداد لأي زيادة غير منطقية بس نقعد ونتناقش، محدش يقولي روح شوفها عند جدتها عشان أنا مش هاعرف يبقي في علاقة طيبة بيني وبين بنتي وأنا قاعد معاها ساعة عند جدتها وهما قاعدين جنبي وقعدتي تبقى كلها مذلة و مهانة".
واسترد "عليش": "محدش يقولي أنتا بتتظاهر أنك عايز تشوف بنتك لكن أنت مش فارق معاك، الابهات هنا اللي هيحسو قد أيه دي حاجة مؤلمة وأنا مش محتاج أعمل ده وطول الوقت طلبت من اي حد قريب منهم أن أحنا ننزل ونقعد ونوصل لحل وسط أنا مش طالب فيه غير اني اخد بنتي يوم في الأسبوع أخرجها وأرجعها، أنا نفسي أحس بحضن بنتي بقالي أكتر من سنة ومقعدش أتكلم في مشاكل حصلت من سنين، أنا أوحش رجل في العالم بس حقي أخد فرصة عشان تكون في علاقة كويسة بيني وبين بنتي، حسبي الله ونعم الوكيل، شكرا للاستاذ شعبان سعيد المحامي وربنا يكملها بخير، شكرا ميرهان زوجتي أنك مستحملة كل ده وفي ضهري ومؤمنة بيا".
