تامر حسني ينصح جمهوره: متبقاش أكبر عدو لنفسك.. خد قرار صارم فوراً في التغير والنهوض والنجاح

رد النجم تامر حسني على تعليقات جمهوره عبر مواقع التواصل الاجتماعي، وذلك عبر حسابه الشخصي على الفيسبوك، وفسر أسباب الإحباط الذي يواجه الكثيرون.

وكتب تامر حسني قائلاً: قرأت معظم التعليقات على قد ما قدرت على اخر بوست ليا اللي تحت دا، وفهمت أكتر حاجتين من تعليقاتهم عاملين احباط لمعظمكم، ١- اليأس من النجاح، ٢- احباط المقربين، وبعضكم واصل لفقدان الأمل والشغف وبعضكم فاقد الأمل في الحياة نفسها، هطلب طلب منكم قبل أي شيء افتكروا معاناتي في بدايتي وظروفي الصعبة من غير أب ومنغير أي فلوس وبنزل اشتغل في الشوارع من عامل بنزينة لسوبر ماركت لفاعل يعني اللي بيبنوا العمارات بطلع طوب واسمنت عشان أرجع بيتي لأمي الغلبانة بأي خمسة جنيه بالإضافه لمرتب النادي لما كنت بلعب كورة كان مرتبي ٢٢ جنيه في الشهر منهم بقى تحويشة الميه والكهربا وعمليات أخويا عشان كان عيان لفترة كبيرة كنت بعمل المستحيل فعلاً عشان أمي وأخويا وعشان أوصل لهدفي.

وأضاف: كان جوايا سعي دايم لطريقين الكورة والغناء وبقول دا عشان ناس كتير عايز أنصحها بالخطة البديلة عشان لو الحلم مجاش يكون في غيره زي ما أنا كان نفسي أبقى لاعب كورة والكورة مش ليا والاندية كلها مشوني رغم تفوقي، كنت بسأل نفسي ليه الأبواب كلها بتتقفل في وشي أتاريها بتتقفل عشان توجهني لمسار أخر ولما آمنت بكدة فهمت قدام أن ربنا كان شايلي الأحسن ليا بس ساعتها مكنتش فاهم.

وأوضح تامر: واللي بيسأل نفسه دلوقتي يعني أنا أكمل في حلمي ولا أشوف حلم تاني هقوله دايماً أطلب من ربنا يساعدك هتلاقي علامات بتجيلك بس الشاطر اللي يفهمها، علامات هتأكدلك تكمل أو لا، بس اجتهد واتعب عشان المجهود دا ليه كرم متحوشلك في مجالك التاني ف أوعى تقول تعبت عالفاضي، وبالنسبه للمحبطين هيفضلوا موجودين أنت اللي بتسمعلهم وأنت اللي بتسمح أنك تتأثر بيهم، أمنع دا فوراً متبقاش السبب في أذية نفسك متتشدش غير لكل جميل ولكل إيجابي هتلاقي كل الحلو بيجيلك ومتعملش العكس عشان هيجيلك برضو عشان كدا بقولك أنت السبب دايماً قول يارب واجتهد وافهم أن الراحة المطلقة في الجنة بس وأحنا على الأرض وربنا قال أنه خلقنا في كبد يعني شقاء عشان يكون عندنا تحدي نكسبه ولازم نكسبه عشان كتير قبلينا كانت ظروفهم أصعب ووصلوا يبقى الموضوع فينا.

واستكمل حديثه قائلاً:  متبقاش أكبر عدو لنفسك، أنت السبب، خد قرار صارم فوراً في التغير والنهوض والنجاح، والله هتوصل متسمعش غير لقلبك وسلم قلبك للي خلقه وتوكل على الله.