ابنة فاتن فريد تحيي ذكراها.. القاتل ناقصله 10 سنين أو 3 ويخرج من السجن

السيدة سمر الراعى نعت والدتها الفنانة الراحلة فاتن فريد عبر حسابها الشخصى بموقع "فيسبوك". 

وفاتن فريد لمع اسمها فى الثمانينات لنجاحها كممثلة ومطربة، حيث قدمت عدد من الأفلام والأغنيات الناجحة، و توفيت منذ 15 عام نتيجة تعرضها للقتل.  

كتبت ابنتها: 

"في ذكري وفاتي أو وفاتك يا أمي حقول كالعادة اللي في قلبي.. أنا مش مقصرة معاكي رغم وجودي برة البلد طول حياتي أنا عملت وبعمل كل اللي أقدر عليه واللي ماقدرش عليه غيري ..

ألبوم وحرقته عشان مايستفيدش من وراكي اللي أنتجه وكان سبب في وفاتك .. ورث وما خلتش دكر يمد إيده علي شقاكي إلا بناتك .. اما حقك عند ربنا .. مش عايزه اقول فيه اكتر من كده  .. من قتل يقتل ده بس كلام بنشوفه في الأفلام لكن العدل ده بس عند ربنا .. 15 سنه وانا عايشه بتمني اشوف يوم في كل واحد أذاكي  .. 15 سنه معناتها ان القاتل ناقصله 10 سنين  يمكن كمان 3 بس  ويطلع من حبسه يعيش حياته وهو لسه في عز شبابه ..! 15 سنه في حد ياتري واخد باله؟..

15 سنه كل سنه يتحرق من قلبي عليكي اكتر واكتر .. مش حقيقي اللي قال الحزن بيتولد كبير وبيصغر .. لأ الحزن بيتولد كبير وبمرور الزمن بيكبر  .. الحزن ده علي الأم اللي ربنا بيديها لكل واحد مره واحده في حياته .. الأم هيا واحده مالهاش بديل هيا سبب نجاتك علي الارض وسبب لنجاتك كمان بعد مماتك ..هيا لما بتروح راحت الدنيا بما فيها .. هيا الندم عليها وعلي التراب اللي كانت بتمشي عليه حتعيش بيه من بعدها لحد مماتك..

انا بصراحه بتحرق كل ما بشوف ليها فيديو ومش عارفه ازاي علي مدي 15 سنه بجمع واحمل وانزل اغاني .. اه انا محظوظه اني بلاقيها في كل مكان بس انا بنتها ولسه مش فاهمه ليه راحت .. انا بنتها يعني بسمعها وبشوفها ماما لا مطربه ولا ممثله .. انا بنتها يعني كل اغنيه ولا لقطه ليها بحملها بدمي وقلبي واعصابي .. انا بنتها يعني صعب اشوفها واسمعها قدامي ..انا بنتها يعني لو مر 100 سنه مش حصدق ولا استوعب ابداً انها مش في حياتي.... 

انا بنتها يعني وفاتها كانت من وفاتي من  15 سنه .. 

ذكري وفاتك ذكري بتحتفل بيها كل الناس مش بس أنا!

ذكري الحب يا فاتن".