نهال عنبر: تغطية جنازة الفنان تكريم له

أوضحت الفنانة نهال عنبر، مسئول الملف الطبي وعضو نقابة المهن التمثيلية، أن النقابة عينت شركة منظمة لتنظيم تغطية الصحفيين للجنازات، لافتة إلى أنه سيكون من أصغر لأكبر فنان لتنظيم الجنازة بشكل أفضل.

وقالت "عنبر": "لازم نحترم مشاعر الأهل اللي فقدوا حد فجأة وأعصابهم تعبانة، والأصدقاء اللي فقدوا حد غالي عليهم، ميبقاش عندهم طاقة للتجاوب مع الصحافة".

وتابعت: "أنا دايما أقول أن الصحافة لما بتغطي الجنازة ده تكريم للفنان دي حاجة كويسة، لكن في لحظات مينفعش الصحافة أو الكاميرات تدخل فيها، زي لحظة دخول المدفن أو لحظة الشيل من الصندوق، ودي دين كمان مش بس مشاعر".

واستطردت: "لما بلاقي كاميرا دخلت في اللحظات دي أهل الميت بيثوروا ثورة عارمة وده حقهم، لأن دي مشاهد مش لطيفة أبدا أن الجسم يبان بالقماش طبعا مش كل الصحفيين بيعملوا كده".

واختتمت نهال عنبر حديثها قائلة: "للأسف لما جينا في جنازة الأستاذ مصطفى درويش نقولهم على الشركة قالوا احنا اتفقنا على كل حاجة فمرضيناش نضايقهم، بس الشركة دي بتنظم كل حاجة، احنا عملنا عقد معاهم أن من أصغر فنان لأكبر فنان ينطم جنازته"، وجاء ذلك خلال مداخلة فيديو مع الإعلامية إيمان الحصري في برنامج "مساء dmc" المذاع عبر شاشة "dmc".

إقرأ أيضًا: نهال عنبر مازحة عن شائعة وفاتها: «ابن عمي بيقول دي لسه بعتالي الصبح لحقت ماتت امتى»

وكانت الفنانة نهال عنبر كشفت في تصريحات خاصة لـ "العاصمة"، عن سبب وفاة الفنان مصطفى درويش الذي وافته المنية منذ أيام، بشكل مفاجئ، موضحة أن السبب هو توقف مفاجئ في عضلة القلب.

وأضافت، أنه مات صغيرًا بالعمر ولكن "ميغلاش على اللي خلقه"، متمنية له الرحمة والمغفرة من الله.