غادة عبد الرازق: لازم أحافظ على شكلي وجسمي وأبقى نجمة بكل المقاييس

أكدت النجمة غادة عبد الرازق، أن الاهتمام بالمظهر والشكل من أولوياتها كفنانة، حتى تحافظ على صورتها الجميلة في أعين الجمهور.

وقالت غادة عبد الرازق، خلال لقاء مع برنامج "كلمة أخيرة" للإعلامية لميس الحديدي: "طول ما أنا عاوزه أمثل وأفضل نجمة، يبقى لازم أحافظ على شكلي وجسمي ولبسي، علشان الناس تفضل تحبني وتحترمني ويشوفوني في أحسن حتة ".

وتابعت: يوم ما أخد القرار إني أعتزل الفن وأقعد في البيت، وقتها بقى لو عايزة أتخن أو ماخدش بالي من شعري ووشي وأعمل اللي عاوزاه، لكن طول مانا نجمة يبقى لازم أبقى نجمة عند الناس بكل المواصفات والمقاييس الصحيحة".

وعن حياتها اليومية وخروجها للسوبر ماركت، قالت: لازم يبقى شكلي حلو، صحيح مش حاطة مكياج كامل، لكن لازم يبقى شكلي كويس، عشان الناس لما تشوفني تحترمني".

وعن حرصها على المشاركة وحضور عروض الموضة في العديد من دول العالم، قالت: "كان المفروض أعمل ده من زمان، ودي من الحاجات اللي كنت مقصرة فيها مع نفسي، بس بدأت آخد بالي منها وأحط عيني عليها، وبدأت أعمل اللى كان لازم أعمله من سنين طويلة".

وأعربت غادة عبد الرازق عن بالغ سعاتها بمسلسل "صيد العقارب" قائلة: سعيدة جداً جداً به، وبشكر ربنا لانه إداني فوق فوق ما كنت أتخيل.

وأكملت: "صيد العقارب" رجعلي الثقة في حاجات كتيرة أوي، ورجعلي حبي لنفسي وحبي للشغل وحبي لجمهوري، حببني في حاجات كتيرة جداً السنة دي، بقيت سوية من جميع النواحي.

أبطال مسلسل "صيد العقارب"

يذكر أن غادة عبد الرازق قدمت في رمضان 2024 مسلسل "صيد العقارب" الذي شارك في بطولته: محمد علاء، وأحمد ماهر، وسيمون، ومحمد علي رزق، وأحمد ماجد، تأليف باهر دويدار، وإخراج أحمد حسن.

اقرأ أيضا: أرملة عمار الشريعي في ذكرى ميلاده: نفسي أشوف قاعة في الأوبرا باسمه