«محتاجة معجزة عشان أرجعله».. أبرز تصريحات شيرين عن حسام حبيب (فيديو)

تداولت أنباء عن عودة المطربة شيرين عبد الوهاب للمطرب حسام حبيب، وأصبح خبر عودة النجمين تريند مؤشر «جوجل»، وفي نفس الوقت أصبح الخبر صادما خاصة بعد تصريحاتها عنه طيلة فترة انفصالهما في مختلف البرامج.

وفي التقرير التالي نرصد أبرز تصريحات شيرين عبد الوهاب خلال شهرين من الإنفصال..

أصبحت حياة شيرين عبد الوهاب محط أنظار الجميع، خاصة بعد زواجها من الفنان حسام حبيب، والأمر بدأ في  ديسمبر الماضي، عندما أكدت شيرين عبد الوهاب خبر انفصالها.

تصريحات شيرين مع الإعلامية نضال الأحمدية:

أطلقت المطربة شيرين عبد الوهاب بعض التصريحات الصادمة للإعلامية نضال الأحمدية، حيث بدأت الحديث بجملة: «أنا الآن فري ولكن حسام حبيب بيغير علي جدا، ولكني الآن أستمتع بحياة الحرية، ولا أندم على ما ضاع مني أو فاتني فأنا أبني شيرين جديدة غير محتلة أو مستعبدة».

وفي الجزء الثاني من الحوار، قالت: «4 سنين بنام على الكنبة.. نومة الكنبة حلوة، أنا بحب حسام بس أنا بحب سرطان، حب حسام ليا بقا وجع وضعف وخوف وأنا محبش أكون ضعيفة ولا خايفة».

وأضافت: «كنت ضعيفة علشان حبيت وأنا اتربيت زي أي ست مصرية إن الراجل يتشال على الراس، أنا ممكن بوردة بدبلة أنا كدا اتجوزت ومؤخر صداقي كان 25 قرش، مين ترضى بكدا غير الست المصرية لكن أنا رضيت.. رضينا بالهم والهم مش راضي بينا؟».

وتابعت: «راجل مش مقدر ست بتظبط نفسها علشان هتدفن عنده في نفس المكان اللي هيدفن فيه.. صعب أوي اللي أنا فيه مش قادرة أستحمله.. تعبت أوي في العلاقة دي».

وعن إمكانية العودة لحسام حبيب، قالت شيرين: «محتاجة معجزة من عند ربنا، حسام حبيب دلوعة أمه وأنا مش عايزة ولد ابن أمه عايزة راجل يحتويني وأنا مش عايزة أتكلم عنه تاني لأنه أخد أكتر من حجمه مش عايزة أغلط فيه».

وقالت أيضا في نفس المداخلة: «حسام خلاص مبقاش موجود في حياتي علشان أتكلم عنه.. دا الحيلة الدلوعة اللي عايز كلمته مسموعة، قولتله مش عاوزة أتجوز ولد علشان أنا هبقى في علاقة ماما وأنا زهقت من دور ماما عايزة أكون سندريلا برنسيسة ولا مرة عشت كحبيبة وأنا رضيت بس للأسف رضينا بالهم والهم مش راضي بينا ولا بحياتي راجل أداني أكتر ما إديت له».

تصريحات شيرين عبد الوهاب في برنامج «الحكاية»:

قالت شيرين عبد الوهاب في برنامج "الحكاية" مع الإعلامي عمرو أديب: «الراجل يفضل راجل حتى لو بيكسب في الشهر 10 جنيه، والست تفضل ست حتى لو بتكسب في الشهر 2 مليون جنيه، أنا الست دي، لو جوزي شغال سواق تاكسي وسابلي 10 جنيه وقاللي ده مقدرتي يا بنت الحلال، هقول له على راسي وأبوس جزمته وأحطها فوق دماغي كمان، لكن ملوش دعوة أنا بكسب كام».

وأضافت: «لو الراجل حس إن الست بتاعته أعلى منه في أي شيء خصوصا الماديات بيحس إنه ضعيف، لكن الراجل يفضل راجل ودكر بقرشه اللي على قد مقدرته، عاجبك يا بنت الحلال تعيشي على كده عاجبك، مش عاجبك هي دي مقدرتي روحي لحالك وسيبيني لحالي».

وكانت شيرين عبد الوهاب ظهرت حليقة الرأس في حفلها الأول بعد الانفصال في أبوظبي، وعلقت على هذه الإطلالة قائلة: «أنا عملت كده عشان مكونش حلوة في عين حسام حبيب ويحصل الانفصال».

جدير بالذكر أن  المطربة شرين عبد الوهاب، أصدرت  بياناً رسمياً تؤكد وقوع الطلاق لحسم الجدل جاء به: «فى ضوء ما تداولته المواقع المصرية والعربية، من أخبار تضمنت انفصال النجمة شيرين عبد الوهاب عن زوجها حسام حبيب، أعلنت النجمة شيرين عبد الوهاب، أن الانفصال وقع بالفعل، وأن أسباب الانفصال تخصها وحدها ولا داعى للخوض فى تفاصيل حياتها الشخصية».