محامية أحوال شخصية: بنصح أي شاب مقبل على الزواج ميكتبش «قايمة»

أكدت المحامية آية صيام، المتخصصة في الأحوال الشخصية، أن قائمة المنقولات غير معترف بها في العالم كله ما عدا مصر، مشيرة إلى أن السبب في فرضها هو خوف الآباء على بناتهم وحقوقهم.

وقالت "صيام": "قائمة المنقولات لم يفرضها الشرع، ولكن فرضها العُرف، للحفاظ على حقوق المرأة، وده موجود بس في مصر، لكن بنلاقي أهالي بيكتبوا في القايمة: "شرشوبة"، "عصاية مقشة"، فده حقيقي مهازل بنشوفها في المحكمة".

وتابعت: "وللأسف العرف السائد في مصر أنا قايمة بنتي مثلا بـ400 ألف وكاتبلها 200 جرام دهب، وهل ده يرضى ربنا؟، وبيتقاله احنا بنتشري راجل، ويابني أنت لو شاريها هتمضي من غير ما تبص، لا طبعا.. أنت أول واحد هيدخلوك المحكمة، أول حاجة بتعملها الزوجة مع أول خلاف زوجي، بتلجأ للقسم وتعمل محضر".

واختتم المتخصصة في الأحوال الشخصية حديثها قائلة: "أنا ضد قايمة المنقولات، وبنصح أي شاب مقبل على الزواج بعدم كتابة قائمة منقولات، اللي يخليك تتجوز بدري، لا أنت تقرص على نفسك وتجهز مبلغ وتفرش شقتك على قدر استطاعتك، وتروح تديها مهر في إيدها، وتحمي نفسك عمرك كله"، وجاء ذلك خلال استضافتها مع الإعلامية لبنى عسل في برنامج "الحياة اليوم"، على قناة "الحياة".