مفيدة شيحة: اللي بيحب بيعدي كل المراحل والاختبارات المتعلقة بعقد السيطرة
كتب: منى صموئيل
كشفت الإعلامية مفيدة شيحة، عن فتى احلام الفتيات خلال الحيل الحالي، مؤكدة ان الفتيات تريد في فتى أحلامها التحضر والذوق.
وأضافت مفيدة شيحة، في برنامجها الستات، المذاع عبر قناة النهار وان، "البنت دلوقتي مبقيتش تحلم براجل يحقق لها أحلامها و يصرف عليها، كل اللي بيشغلها قبل خطوات الجواز انها تتأكد من تحضره و ذوقه واخلاقه و شياكته واحترامه للخصوصيه بتاعتها".
وتابعت شيحة، "مناقشة الحرية والمسافة الشخصية واختيار الأصحاب والسفر مع الأصحاب، الحرية في اللبس والأفكار وكل التفاصيل دي أهم من انه يتقدم لها ويتجوزها وهم مختلفين، او يتجوزها و يغير كل طريقة حياتها و أفكارها، هي مش هتتغير لكن هيفشلوا".
وأكملت شيحة، "بردو خلي بالك الجيل دا من البنات اقويا ومحققين ومتعلمين كويس وشايفين الدنيا الواسعه، مش هتقلل من نفسها عشان شخص هو زيها وأحيانا بتكون اشطر وانجح منه، هي بتسأل نفسها هو هيقدم لها ايه؟ مهي كل حاجة عندها، لازم يكون في حاجة هو بس اللي يقدر يعملها عشانها، هنا مش هيلاقي غير إجابة واحدة انه يكون صديق وداعم حقيقي وسند لآخر العمر، بمعنى المشاركة في الحياة فعلاً بمعنى الإخلاص كل العمر.
وانهت شيحة، "دلوقتي اللي بيحب ويستحق اللي بيعدي كل المراحل والاختبارات المتعلقة بعقد السيطرة والنرجسية وكل الريد فلاجز، واختبارات المسؤولية الحقيقية والمشاركة والمساواة في تفاصيل الحياة الجاية كلها، واختبارات التحضر و الحرية و احترام المساحة الشخصية".
