بعد الجدل بشأن ظهورها مع الفيشاوي.. رانيا يوسف: «مش هتجوزه.. وطول عمري بلبس مايوه»

بعد حالة الجدل التي أثُيرت بشأن النجمة رانيا يوسف، وظهورها مع النجم أحمد الفيشاوي، في صورة تم التقاطها في كواليس فيلمهما الجديد ورد وريحان، وخروج العديد من الأقاويل عن نيتهما في الزواج،  خرجت رانيا يوسف لتعلق على حقيقة الأمر.

وقالت «رانيا» خلال لقائها مع الإعلامية ياسمين عز في برنامج «كلام الناس»: «الناس طلعت شائعات إني هتجوز أحمد الفيشاوي بسبب الصورة، وإحنا لايقين على بعض بس أنا مش ناوية أتجوز، وأنا وأحمد بنعمل فيلم وكنا بنقرأ السيناريو في الصورة، الجواز سهل ولكن المشكلة هتجوز مين؟ مين هيفهم ظروف حياتي؟». 

وأضافت: «أنا بخاف من الحسد لأن نجمي خفيف ومن أقل حاجة الناس مركزة معايا ومهتمين بأخباري، ولكنهم مش بيركزوا على شغلي وبيشوفوا أنا بلبس إيه مع إن فيه ناس بتلبس أكتر مني، والقالب غالب لأننا ممثلين  ولازم نهتم بـ شكلنا وجسمنا ونكون قدوة للناس».

وأوضحت: «معرفش ليه الناس بيقولوا أني جريئة، وأنا بنزل صوري بالمايوه لأني طول عمري بلبس شورت ومايوة مش هتغير عشان أرضي حد، ولو مش عاجباك متابعنيش، وبناتي بيقولوا لي خليكي براحتك وبحريتك ومتتغيريش، وواخدين مني قوة الشخصية بحكم اللي شافوه معايا».

واختتمت: أنا ممكن أكون بمليون راجل لأني بشتغل من وأنا 16 سنة وشايلة مسئوليات واتعودت أصحى الصبح أعمل كل حاجة، ومش مستنية حد يعمل لي حاجة، وكنت أتمنى أكون مدلعة، ولكن الدلع  فيه عيوب بردو لأن لو الشخص اللي معتمدة عليه دا راح الدنيا هتقع.