ممدوح موسى لـ«العاصمة»: «عملت برامج أتحدى أي حد يعرف يعملها»

قال الإعلامي ممدوح موسى، إنّه قدم خلال مشواره الإعلامي برامج فنية مهمة نجح في أن يجمع فيها نجوم الصف الأول ودون مقابل أي مادي.

وقال موسى، خلال ندوة فنية له بموقع العاصمة:«عملت برامج أتحدى أي حد في مصر والوطن العربي يعرف يعملها دلوقتي وبالإمكانيات بتاعت دلوقتي، وأتحدى أي حد يعرف يجيب الـ30 نجم السوبر ستار اللي أنا جبتهم في برنامج زي القمر، وينزلهم الشارع يغنوا ببلاش».

وكشف عن رأيه في الفرق بين الجيل الجديد والجيل السابق: «الفرق بين الجيل اللي اتعملت معه والحالي.. النجاح زمان كان صعب.. دلوقتي ممكن تعملي حاجة تبقى تريند.. وبقى في ممثلين يطلعوا يقولوا أي حاجة علشان يبقوا تريند.. اللي بيفضل العمل الجامد والفنان اللي بيحترم نفسه وبيحترم جمهوره والفنان المغرور مش بيكمل».

وعن رأيه فيما تقدمه المذيعة ياسمين عز من جدل بسبب انحيازها للرجل، ونوعية هذه البرامج، قال ممدوح موسى: «ياسمين عز لما كانت بتعمل البرنامج بتاعها العادي كنت بتفرج.. ولكن لما دخلت في الموضوع ده وركزت في التريند ما بقتش بتفرج ودلوقتي بقلب البرنامج لما بعدي عليه.. لأن اللي بتعمله كتير وأوفر، ومش كل الرجالة حلوين ومش كل الرجالة جدعان، وبصراحة معظم اللي بيعملوا برامج عن الستات ستات معقدة ومش بكلم عن حد معين».